"Алты бала үҫтергән әсәйебеҙ беҙгә сыбыҡ түгел, тауыш та күтәрмәне"

"Килен" спектакле тураһында бик күп фекерҙәр булды. Йәш яҙыусы Заһиҙә Мусинаның повесы буйынса режиссер Фирғәт Ғарипов сәхнәләштергән тамаша берәүҙе лә битараф ҡалдырманы, сөнки ул тормошсан, халыҡсан. Бына үҙе лә актер булған Сәғиҙулла Байегет ошо турала бик уйландырғыс фекерҙәрен уртаҡлашҡан. Уҡыйыҡ әле. "Мәжит Ғафури исемендәге Башҡорт дәүләт академия драма театры 104 се ижад миҙгелен режиссер Фирғәт Рәмил улы Ғарипов ҡуйған "Килен" спектакле менән асты. Көтөлмәгән хәл булды. Сөнки Фирғәт ҡусты был юлы күптәрҙе аптыратты, буғай, тиһәк, бик йомшаҡ булыр. Мине хатта бер килке шаңҡытҡыс нокаутка ла ебәреп алғандай тойолдо... Спектакль башында уҡ атайһыҙ тороп ҡалған ике кескәй ҡыҙ баланың тормошо тураһында асып бирҙе режиссер. Советтар Союзының ҡоларға торған осоронда балаларын нисек тә аяҡҡа баҫтырырға тип яфа сиккән һауынсы, ә үҙе ни сәбәптәндер уҫал әсә кешенең ғәзиз балаларын сыбыҡ менән ярғанын күреү күңелгә шом һалды. Әйтерһең, әсәйемдең бала сағындағы кисергән ауырлыҡтарының бер өлөшөн күҙ алдына баҫтырҙы.Өләсәйебеҙ Миңлебаныу тураһында уҫал һәм урыны менән ҡаты ла булды тип йыш хәтерләй әсәйебеҙ.Нисек итеп өс апалы-һеңлеле бер күлдәкте алмашлап кейеп яланаяҡ мәктәпкә йөрөүҙәр һәм башҡа һуғыш йылдары ауырлыҡтары тураһында иҫкә алһаң, үҙәгеңә үткәнде оноторлоҡ түгел, ти... Әсәйебеҙ ҙә ғумер буйы фермала һауынсы һәм быҙау ҡараусы булып хеҙмәт итте. Алты баланы аяҡҡа баҫтырҙы, әммә спектаклдәге әсәләрҙән айырмалы, беҙгә ҡарата тәрбиәһе тотош бүтәнсә булды. Сыбыҡлау түгел, хатта тауыш күтәрмәүе йылы хәтирәләр уятты күндерҙе, һағыныу тойғоларын көсәйтте... Спектаклдә хәлдәр әүҙемләшеп, уртаһына етә килә, үҙем дә атай булараҡ хис-тойғоларға сумдым. Мин дә бит ҡайһы ваҡыт балаларҙың тормошона ҡыҫылырға ашҡынып торам. Ә үҙем һуң һис тә ҡыҫылғандарын яратмай инем, әле лә ундайҙы бигүк үҙһенеп бармайым... Тимәк, уйланырға урын бар", - тип яҙған ул. Сығанаҡ һәм фото: https://vk.com/id125235703