1 ноябрҙә Башҡортостан Башлығы Радий Хәбиров Евразия фән-мәғариф үҙәгенең юғары уҡыу йорттары студенттарының донъя кимәлендәге кампусы төҙөлөшө майҙансығында булды. Уны “Фән һәм университеттар” милли проектына ярашлы төҙөйҙәр. Хәтерегеҙгә төшөрәбеҙ: 2022 йылдың декабрендә Халыҡ-ара бизнес аҙналығында Башҡортостан Хөкүмәте һәм “Эталон” төркөмө кампус төҙөү һәм уны артабан файҙаланыу буйынса концессияға ҡул ҡуйҙы. Объект ике этапта төҙөлә. Тәүге сиратын, майҙаны 36 мең квадрат метр булған IQ-паркты быйылғы йыл аҙағынаса файҙаланыуға тапшырасаҡтар. Объектты ҡарағанда республика Хөкүмәте Премьер-министры Андрей Назаров төҙөүселәрҙең финиш биҙәкләүенә тотоноуы һәм эштең тәүлек әйләнәһенә барыуы тураһында әйтте. Радий Хәбиров бина фасадының һәм эске бүлмәләрҙең дизайны менән танышты, раҫланған графикты күҙәткәндәре өсөн төҙөүселәргә рәхмәт белдерҙе. “Масштабы буйынса был – республикалағы һуңғы йылдарҙағы иң ҙур төҙөлөш, – тине Радий Хәбиров. – Бында 550 белгес ялһыҙ эшләй. Ваҡыт ҡыҫҡан шарттарҙа был кешеләр ысын хеҙмәт батырлығы күрһәтә”. IQ-парк бинаһында Башҡортостан Башлығы юғары уҡыу йорттары студенттары кампусының беренсе сиратын төҙөүҙе тамамлау мәсьәләләре буйынса эш кәңәшмәһе үткәрҙе. Республика етәксеһе кәңәшмәлә ҡатнашыусылар менән шулай уҡ икенсе сиратты төҙөү буйынса ла һөйләште. Төҙөлөш эштәрен башлар алдынан яңыртылған техник-иҡтисади күрһәткестәр, администрация һәм торлаҡ биналарының архитектура-планлаштырыу ҡарарҙары яраштырыла. “Кампустың беренсе сиратҡа ҡушылып төҙөләсәк икенсе сираты 150 мең квадрат метрҙы биләйәсәк. Был эшкә 2024 йылдың башында тотонасаҡбыҙ. Рәсәйҙең Фән һәм юғары белем министрлығы менән килешелгәнсә, беҙ объектты 2025 йылдың 1 декабренә тапшырырға тейешбеҙ”, – тине Радий Хәбиров. Фото: Башҡортостан Башлығы сайты.