"Ғәфү итмәҫлек хаталар яһаһа ла, мин ғәфү итә алдым..."

Кисә кис билдәле блогер Рөстәм Нәбиев үҙенең телеграм-каналында атаһы тураһында иҫтәлектәре менән уртаҡлашты. “Атайым менән мөнәсәбәттәр һәр ваҡыт ҡатмарлы булды. Ғүмеремдең ҙур өлөшөн мин уға үпкәләп йәшәнем. Ағайым менән икебеҙҙе ҡалдырған сағында миңә ике йәш тә тулмағайны. Шулай килеп сыҡты, атайым әсәйемде үлтерҙе һәм төрмәгә эләкте. Был турала ентекләп һөйләгем килмәй, һеҙ ҙә, зинһар, иғтибар итмәгеҙ. Был хәлдән һуң беҙҙе үҙенә атайымдың апаһы алған. Үҙенекеләр кеүек үҫтергәне өсөн ҙур рәхмәт уға. Атайым менән күрешеп торҙоҡ, тик ул беҙҙең тормошта әллә ни ҡатнашманы. Мине балалыҡ үпкәләре ебәрмәне: “Һин мине ҡалдырҙың, ташланың, һөйөү бирмәнең”. Ә ҙурайғас, мин күпте аңланым һәм ҡабул иттем. Күп нәмә өсөн атайымды ғәфү иттем. Беҙ бик оҙаҡ аралашманыҡ. Тик аҙаҡ мин беренсе аҙым яһаным һәм уның 55 йәшлек юбилейына ҡотлау ебәрҙем. Шул саҡтан беҙҙең аралашыу ипкә килде. Балаларым уны ныҡ ярата ине. Ғүмер буйы хыялланғанымды алдым. Былтыр 4 майҙа, 56 йәшендә, атайым вафат булды, инфаркт. Емереклектәр араһында ятҡанда мин атайымды уйланым. Ә ете көндән реанимацияла уянғас, уны күрҙем. Ул йылмая ине. Аяҡһыҙ ҡалғанымды белгәс, мин иланым, ә ул йылмайҙы. Тик аҙаҡ ҡына аңланым: ошолай ул барыһы ла яҡшы буласаҡ тип әйтергә тырышҡайны. Атайымды һағынам. Ул ҡатмарлы кеше ине. Хаталар эшләне, төҙәтеп булмаҫлыҡ хаталар, ғәфү итерлек тә түгел. Тик мин уны ғәфү иттем. Сөнки мин уның балаһы, ул минең тормошомда булһын тип теләнем. Әле шуны аңланым – атай-әсәйҙе һайламайҙар. Нисек бар, шулай ҡабул итергә кәрәк. Уны бәхетле иткем килде. Тик өлгөрмәнем. Мин уны ныҡ яратам. Тик был турала уға бер тапҡыр ҙа әйтмәнем. Атай-әсәйҙәрегеҙ иҫән саҡта ҡәҙерен белегеҙ”, – тине ул илап. Фото: Телеграм-канал.