Мәктәп автобусы ҡатнашлығындағы аварияла дүрт бала зыян күргән

Бөгөн, 31 октябрҙә, иртәнге сәғәт туғыҙҙар тирәһендә Нефтекама ҡалаһында "Лада Ларгус" һәм мәктәптең “ПАЗ” автобусы бәрелешкән. Авария һөҙөмтәһендә “Лада Ларгус” водителе һәм уның өс пассажиры, шулай уҡ автобустағы дүрт бала дауаханаға оҙатылған. Республика ЮХХДИ идаралығы мәғлүмәттәре буйынса, “Лада Ларгус” автомобиле йәйге резинала йөрөүе сәбәпле авария булған. Водитель автомобилгә идараны юғалтып, ҡаршы юлға сығып, автобусҡа бәрелгән. Шулай уҡ бөгөн Сибайҙа иртәнге сәғәт 11-ҙә Крупская һәм Революция урамдары киҫелешендә авария теркәлгән. Яҡынса фараз буйынса, Сибайҙан 83 йәшлек водитель “ВАЗ-2106” автомобилендә икенсе дәрәжәле юлдан сыҡҡанда “Лада Ларгус” автомобиленә юл бирмәгән, шула арҡала авария булған. Юл-транспорт ваҡиғаһы һөҙөмтәһендә “ВАЗ-2106” автомобиле водителе йәрәхәтләнгән. Дүртөйлө районында ла бөгөн иртәнге сәғәт 10-да Саҡмағош - Дүртөйлө автомобиль юлының 40-сы километрында 60 йәшлек ир “Лада Ларгус” автомобилендә, юлдан ситкә сығып китеп, түңкәрелгән. Юл-транспорт ваҡиғаһы һөҙөмтәһендә пассажир урындағы дауаханаға оҙатылған. Былар барыһы ла бөгөн иртәнсәк теркәлгән авариялар. Уларҙың һәр бер осрағы буйынса полиция хеҙмәткәрҙәре тикшереү алып барыла. Хөрмәтле водителдәр, юл-хәрәкәте ҡағиҙәләрен теүәл үтәгеҙ. Әлеге ваҡытта һауа шарттары шәптән түгел: яуым-төшөм күҙәтелә, урыны менән ҡар яуа. Шуға ла автомобилдәргә ҡышҡы резиналы тәгәрмәстәр кейҙерергә күптән ваҡыт. Һеҙҙең автомобилдең торошона яуаплы ҡарауығыҙ кеше ғүмерҙәрен ҡотҡарасаҡ. Фото һәм мәғлүмәт сығанағы: @bash_gibdd