Хөкүмәт кәңәшмәһендә тауарҙарҙы мотлаҡ “Честный знак” билдәһе менән маркировкалау системаһын үҫтереү мәсьәләһе ҡаралды. Был уларҙың сифатын контролдә тотоу өсөн кәрәк. Сауҙа һәм хеҙмәттәр министры Алексей Гусев әйтеүенсә, проект илдә 2016 йылдан тормошҡа ашырыла. Уның операторы – перспективалы технологияларҙы үҫтереү үҙәге. Федераль ҡануниәткә ярашлы етештереүсе бик күп төрлө тауарҙарҙы маркировкаларға тейеш – дарыуҙар, тәмәке, һөт, еңел сәнәғәт тауарҙарының ҡайһы бер төрҙәре. Шул уҡ ваҡытта маркировкаларға тейешле тауарҙар һаны даими рәүештә киңәйә. Мәҫәлән, 2023 йылдың 1 апреленән һыра эшләүсе компаниялар, һыра һәм еңел алкоголле тауарҙар етештереүселәр кегтарҙағы тауарға штрих-код төшөрөргә тейеш. 1 октябрҙән – быяла һәм ПЭТ һауыттарға, ә 2024 йылдың 15 ғинуарынан – башҡа төр ҡаптарға ла. Ҡулланыусы ”Честный знак” ҡушымтаһын телефонына ҡуя һәм тауарҙың легаллеген тикшерә, уның составын, етештереү урыны һәм ваҡытын белә, шулай уҡ асыҡланған контрафакт тураһында хәбәр итә ала. – Башҡортостан Волга буйы федераль округында “Честный знак” системаһында теркәлгән предприятиелар һәм шәхси эшҡыуарҙар араһында беренсе урынды биләй, – тине Алексей Гусев. Шулай уҡ министр әйтеүенсә, Башҡортостан 2023 йылда ҡулланыусыларҙың яҡлылығы буйынса федераль рейтингта беренсе урын яулаған. Рейтингтағы урын төбәктең ҡулланыусылар хоҡуҡтарын яҡлау тармағындағы сәйәсәте һөҙөмтәлелеген күрһәтә. Радий Хәбиров министрлыҡты был еңеүҙәре менән ҡотланы һәм һөҙөмтәле эш өсөн рәхмәт әйтте. Фото: Башҡортостан Башлығы сайты.