Акция сиктәрендә йыйылған макулатуранан төҙөлөштә ҡулланыла торған йылытҡыс эшләнә. Ҡатырға, гәзит-журналдар, дәфтәрҙәр һәм әҙәби ҡиммәте булмаған китаптар... Макулатураға ҡағыҙҙың барлыҡ төрҙәре ҡабул ителә. Эшкәртелгән ҡағыҙҙан тәбиғи йылытҡыс эшләнә. Макулатура өлөштәргә бүленеп, үҙенсәлекле «тирмән»гә оҙатыла. Ике ҡат ваҡлау этабын үткән сеймал тығыҙланып, ныҡлы тоҡтарға тултырыла. Бер сәғәт эсендә ярты тонна, йәғни 30 тоҡ йылытҡыс әҙерләнә. «БумБатл» Бөтә Рәсәй акцияһына Башҡортостандың Тәбиғәттән файҙаланыу һәм экология министрлығы хеҙмәткәрҙәре лә ҡушылды. Тәбиғәттән файҙаланыу һәм экология министрлығы тапшырған 177 килограмм макулатуранан 15 тоҡ йылытҡыс сыҡҡан. Яҡын арала был етештереү ысулын ойоштороп ебәргән «Экомамыҡ» предприятиеһына студенттар һәм мәктәп уҡыусылары өсөн экскурсиялар үткәрә башлау күҙаллана. Был үҫеп килгән быуында ҡалдыҡтар менән дөрөҫ эш итеү, шул иҫәптән сүп-сарҙы айырым йыйыу ғәҙәтен булдырасаҡ, тигән фекерҙә министрлыҡ хеҙмәткәрҙәре. Александр Сарбашев, «Экомамыҡ» ойошмаһының башҡарма директоры: - Макулатура тапшырыу акцияһына ойошмалар ғына түгел, яуаплы, тәбиғәткә һаҡсыл ҡарашлы граждандар ҙа ҡушыла. Берәүҙәр уны үҙҙәре алып килһә, икенселәренә машина ебәрәбеҙ. Ләкин был осраҡта макулатура күләме 100 килограмдан күберәк булырға тейеш. 10 октябрҙә старт алған экологик акция сиктәрендә әле үк биш тонна макулатура йыйылған. Иң күбе - өс тоннаны илештәр тапшырған, Благовещен районы ике тонна ҡағыҙ ебәргән. Әле Салауат ҡалаһынан да сеймал алып киленә. «БумБатл» экологик акцияһына ҡушылырға һуң түгел. Ул 15 ноябргә тиклем дауам итә. Әлеге сара Рәсәй Президенты Владимир Путиндың май указы менән булдырылған “Экология” (национальный проект “Экология”) милли проекты сиктәрендә тормошҡа ашырыла. Фото: Башҡортостандың тәбиғәттән файҙаланыу һәм экология министрлығынан алынды.