Андрей Назаров Өфө фән һәм технологиялар университетын бер йыллығы менән ҡотланы

Андрей Назаров Өфө фән һәм технологиялар университетын бер йыллығы менән ҡотланы Өфө фән һәм технологиялар университеты (артабан – УУНиТ) бер йыллығын билдәләне. Тантаналы сарала Башҡортостан Хөкүмәте Премьер-министры Андрей Назаров, РФ фән һәм юғары белем биреү министры урынбаҫары Ольга Петрова, РФ Дәүләт Думаһы вице-спикеры Борис Чернышов, УУНиТ ректоры Вадим Захаров ҡатнашты. РФ фән һәм юғары белем биреү министры Валерий Фальков студенттарҙы һәм преподавателдәрҙе видео аша ҡотланы. -Университет Рәсәй дәүләтселеге нигеҙҙәре модулен индереү буйынса терәк булып тора. Федераль проект һәм программаларҙа ҡатнашыу вуздың үҫеше өсөн етди стимул бирер тип ышанам. Өфө фән һәм технологиялар университеты коллективына энергия, ныҡышмаллыҡ, ә студенттарға ҙур еңеүҙәр һәм киләсәк һөнәрҙәрендә уңыштар теләйем, - тип ҡотланы Валерий Фальков. Премьер-министр Андрей Назаров бөтә институттарҙың, университеттың факультеттары һәм филиалдарының экспонаттары һәм эшләнмәләре ҡуйылған фәнни-интерактив күргәҙмәне ҡарап сыҡты. Унда 600 йүнәлеш буйынса республика студенттарының яртыһы тиерлек – 48 меңдән ашыу - белем алған вуздың бар мөмкинлектәре сағылдырылғайны. -Өфө фән һәм технологиялар университетын барлыҡҡа килтереү заман талабы ине. Ул ябай булмаған берҙән-бер дөрөҫ ҡарар булды. Иң йәш вуздың нигеҙенә Башҡорт дәүләт һәм Өфө авиация университеттарының күп йыллыҡ матур традициялары һалынған, - тип билдәләне Премьер-министр. Ул шулай уҡ вуздарҙың берләшеүенең ыңғай һөҙөмтәһе тураһанда ла әйтеп үтте. Университет Рәсәйҙә тәүге иң эре биш уҡыу йорттары иҫәбендә, “Приоритет-2030” президент программаһында үҙ позицияһын яҡшыртты. Был программа сиктәрендә 6 стратегик проект тормошҡа ашырыла, уларҙың 3-әүһе Рәсәйҙең технологик суверенитетын тәьмин итеүгә йүнәлтелгән. Андрей Назаров билдәләүенсә, төҙөлөп ятҡан Вуз-ара студенттар кампусын да Өфө фән һәм технологиялар университетындағы белем биреү һәм фән синергияһынан тыш күҙ алдына килтереп булмай. Уның нигеҙен Башҡортостан вуздарының йәш ғалимдары тәшкил итәсәк. Хөкүмәт Рәйесе вуз алдында торған мәсьәләләр тураһында ла һөйләне: 2025 йылға УУНиТ Рәсәйҙең иң яҡшы 20 уҡыу йорто исемлегенә инергә тейеш, ә 2030 йылға - тәүге 10 иҫәбенә. Бының өсөн бөтә мөмкинлектәр ҙә бар, тип һыҙыҡ өҫтөнә алды Андрей Назаров. Премьер-министр был турала социаль селтәрҙәге сәхифәһендә лә яҙҙы. “Беҙ бына тигән уҡытыусылар һәм һәләтле, ҡыҙыҡһыныусан студенттар менән ғорурланабыҙ! Һеҙҙең ҡулда – башҡорт фәненең киләсәге” тигән юлдар бар унда. Фото: https://pravitelstvorb.ru/news/22211/