Туймазы ҡалаһындағы 8-се мәктәптең 8-се класс уҡыусылары Өфө ҡалаһында булды. Туристик сәйәхәт “Туризм һәм ҡунаҡсыллыҡ индустрияһы” милли проектының “Мәктәп туризмы” программаһын тормошҡа ашырыу сиктәрендә мөмкин булды. – Төбәктең тәжрибәле туроператорҙары тарафынан ойошторолған уҡыусылар өсөн туристик маршруттар үҙ эсенә белем биреү һәм тәрбиә компонентын ала. Ике көнлөк сәйәхәттәр балаларға республиканың тарихы һәм мәҙәниәте менән танышыу, беҙҙең үҙенсәлекле тәбиғәт объекттарын күреү, ҡыҙыҡлы оҫталыҡ дәрестәрендә булыу һәм дөйөм алғанда ҡыҙыҡлы итеп ваҡыт үткәреү мөмкинлеге бирә, – тине республиканың эшҡыуарлыҡ һәм туризм министры Рөстәм Афзалов. Туймазынан килгән балалар өсөн баш ҡаланың ҡыҙыҡлы урындары буйлап экскурсия ойошторолдо, улар Милли музейҙа, “Рәсәй – минең тарихым” мультимедиялы тарихи паркында булған. 3D-моделләштереү буйынса оҫталыҡ дәресендә балалар бик сағыу тәьҫораттар алған. – Баш ҡалаға сәйәхәт балаларҙа тик ыңғай тәьҫораттар ҡалдырҙы. Ҡыҙыҡлы һәм мауыҡтырғыс сәйәхәттәр уҡыусыларға баш ҡаланың тарихын яҡшыраҡ белергә һәм өс үлсәмле һанлы моделдәр булдырыу буйынса беренсе тәжрибә алырға ярҙам итте. Балалар бөгөндән 3D-моделдәр, реалистик текстуралар, материалдар һәм анимациялар булдырыу буйынса уҡыуҙарын дауам итергә теләк белдерә, – тине директорҙың кластан тыш эш буйынса урынбаҫары Зөлфиә Миңнуллина. Билдәле булыуынса, “Туризм һәм ҡунаҡсыллыҡ индустрияһы” (национальный проект “Туризм и индустрия гостеприимства”) милли проекты Рәсәй Президенты Владимир Путиндың май указы менән булдырылды. Фото: Эшҡыуарлыҡ һәм туризм министрлығы.