Ошо көндәрҙә Башҡортотан Республикаһы вәкилдәре Ҡытай Халыҡ Республикаһында эшләне. Сара барышы тураһында Башҡортостан Хөкүмәте Премьер-министры Андрей Назаров үҙенең социаль селтәрҙәрҙәге сәхифәһендә йыш яҙҙы. Ә бөгөн иһә эшлекле сәфәрҙең тамамланыуы тураһында хәбәр итте. “Ҡытай Халыҡ Республикаһына рәсми визит тамамлана. Аҙаҡҡы пункт булараҡ Пекинда Башҡортостандың Ҡытайҙағы вәкиллегендә булдым. Әйткәндәй, Рәсәй илселеге һәм Рәсәй мәҙәни үҙәге янында урынлашҡан. Коллегаларыбыҙ менән берлектә башҡорт-ҡытай хеҙмәттәшлеген үҫтереү буйынса юл картаһының төп пункттарын һәм Ҡытайҙа ҡул ҡуйылған килешеүҙәрҙе үтәү алымдарын барланыҡ. Атап әйткәндә, Башҡортостандан Ҡытайға тауар ебәреү өсөн логистика сиселештәрен әҙерләү өҫтөндә эшләргә кәрәк.Ҡытай компанияларының күбеһе 22 - 25 ноябрҙә Өфөлә үтәсәк Халыҡ-ара бизнес аҙналығында ҡатнашыуын раҫланы ла инде. Әле ҡытай партнерҙарыбыҙ Башҡортостанда командировкаларҙы һөҙөмтәле үткәреп, уларҙың профилендәге йүнәлештәрҙе өйрәнә алһын өсөн һәр компания өсөн айырым программалар әҙерләйбеҙ. Ҡытай ғәйәт ҙур баҙар хеҙмәттәшлеге һәм төбәк иҡтисады өсөн ҙур мөмкинлектәр аса. Әлбиттә, был йүнәлеште эшебеҙҙә өҫтөнлөклө итергә кәрәк. Был тәҡдим республика Башлығы Радий Фәрит улы Хәбиров менән алдан тикшерелде. Ул Ҡытай партнерҙарына ҡағылышлы проекттарҙы һәм мәсьәләләрҙе махсус тәртиптә ҡарарға кәрәклеген хупланы. 2024 йылдың яҙында Башҡортостан делегацияһының эш сәфәре сиктәрендә Ҡытайҙа Башҡортостандың позицияһын мөмкин тиклем нығытыу маҡсатында Пекинға ғына түгел, илдең бер нисә эре провинцияһына барырға ниәтләйбеҙ. Иҡтисади һәм инвестиция проекттарынан тыш, беҙ шулай уҡ бер нисә гуманитар, мәҙәни һәм туристик проекттар әҙерләйәсәкбеҙ. Мәғариф өлкәһендә хеҙмәттәшлеккә ҙур иғтибар бүленәсәк. Беҙ университет-ара студенттар кампусын төҙөйбеҙ, төп бинаның ете башняһының береһенә Ҡытайҙың бөйөк ғалимы һәм уйлап табыусыһы Шэнь Ко исеме биреләсәк. Был Ҡытай менән хеҙмәттәшлек символдарының береһе лә, хөрмәт тә. Өфөгә ҡайтҡас, тейешле министрлыҡтарҙағы хеҙмәттәштәрем менән Ҡытайға сәфәребеҙ һөҙөмтәләренә тәрәнерәк анализ яһарға ниәтләйем”, - тип яҙа социаль селтәрҙәрҙәге сәхифәһендә Андрей Назаров. Фотолар Башҡортостан Хөкүмәте сайтынан алынды.