Артист кеше һәр саҡ иғтибар үҙәгендә. Теләйме ул, юҡмы сәхнәгә сығырға тейеш, социаль селтәрҙә лә улар менән тамашасылары ныҡ ҡыҙыҡһынып, күҙәтеп барыусан. Элек- электән кешегә күҙ тейеү тигән төшөнсә бар. Сәхнә кешеләренә күҙ тейәме, улар ундай төшөнсәгә ышана, ышанһа, нисек һаҡлана? Был хаҡта Башҡортостандың һәм Татарстандың халыҡ артисы, яратҡан йырсыбыҙ Айҙар Ғәлимовтың фекерен тыңлап үтәйек. “Күҙ тейеүҙе бала саҡтан беләм. Бәләкәй саҡта әсәйемдең юрғанға төрөп, Хәбибә инәйгә өшкөртөргә алып барғаны әле лә иҫемдә. Әйткәндәй, һоҡланып ҡараһам, үҙемдең дә күҙ тейеүе бар. Үҙемдең һөнәрем буйынса ла йыш күҙ тейеүсән. Һиңә залдан мең пар күҙ ҡарап тора, ниндәйҙәре генә юҡ унда. Ул үҙен һуңынан һиҙҙерә. Икенсе көнө лә кеше рәтенә инә алмаҫҡа мөмкинһең. Көслө энергетикалы кешеләр бар. Уларҙың да күҙ ҡараштары кемгәлер ыңғай тәьҫир итергә мөмкин, ә кемгәлер насар йоғонто яһауы ла ихтимал. Шуға күрә тамашасы алдына сығыр алдынан үҙеңә төрлө энергиянан һаҡлаусы ҡалҡан ҡуйырға өйрәнергә тура килә. Әлбиттә, бындай ваҡытта доға уҡыу ҙа ярҙам итә. Үҙ тәжрибәмдән сығып әйтәм: концерттан бигерәк, унан һуң булған осрашыуҙар, интервью, автографтар биреү, фотоға төшөүҙәр тағын да күберәк энергияны ала. Кеше һинең янында, күҙҙәр һиңә туранан-тура ҡарап тора. Мин бындай ваҡыттарҙа ҡарашты аҫҡа йүнәлтергә тырышам. Аллаға шөкөр, үҙемә лә ниндәйҙер энергетика бирелгән һәм ул мине һаҡлай”, - ти Айҙар Ғәлимов. Ә һеҙ күҙ тейеүгә ышаныһығыҙмы һәм нисек һаҡланаһығыҙ? Үҙегеҙҙең фекерҙәрегеҙҙе яҙып үтһәгеҙ ине. Фото: yandex.ru