Իսրայելի բանակը ցամաքային գործողություն է սկսում Գազայում, Kommersant.ru-ի փոխանցմամբ՝ հայտնել է բանակի ներկայացուցիչը։
Նշվում է, որ մեկ ժամ առաջ Գազայի բնակիչները հայտնել են, որ այժմ Իսրայելի կողմից իրականացվում է ամենազանգվածային օդային հարձակումը հակամարտության սրումից ի վեր։ Ամբողջ հատվածում ինտերնետ կապ չկա։ Սեկտորի սահմանին նկատվել են իսրայելական տանկեր և հրետանի։
«Իսրայելի ռազմաօդային ուժերը շատ ակտիվ են գրոհում ստորգետնյա թիրախները և ահաբեկչական ենթակառուցվածքները: Վերջին մի քանի օրերի ընթացքում մեր կողմից իրականացված հարձակողական գործողություններից հետո ցամաքային ուժերն այսօր երեկոյան ընդլայնում են իրենց գործողությունները», – ասել է Իսրայելի պաշտպանության բանակի ներկայացուցիչը (մեջբերում է Ynet-ը):
Հոկտեմբերի 7-ի առավոտյան պաղեստինյան իսլամիստական ՀԱՄԱՍ շարժումը հայտարարել էր Իսրայելի դեմ «Ալ-Աքսա ջրհեղեղ» ռազմական գործողության մեկնարկի մասին։ Իսրայելի հարավն ու կենտրոնը Գազայի հատվածից տասնյակ հրթիռներով են գնդակոծվել։ Իսրայելական բանակն ի պատասխան հայտարարել էր Գազայի հատվածում «Երկաթե սրեր» հակաահաբեկչական գործողության մեկնարկի մասին։ Իսրայելական կործանիչները հարձակվել են ՀԱՄԱՍ-ի վրա։ Հակամարտության սրման հետևանքով երկու կողմերում էլ կան զոհեր և վիրավորներ, որոնց թիվը ժամ առ ժամ փոխվում է։