Ҡапыл көндәрҙең һыуытыуы йыш ҡына күптәрҙә тамаҡ ауыртыуына килтерә. Табипҡа күренергә ваҡытығыҙ булмағанда, өй шарттарында дауаланыу өсөн бер нисә кәңәш: Бер стакан йылы һыуға бер балғалаҡ тоҙ, бер семтем аш һеркәһе һәм өс тамсы йод ҡушып болғатырға ла шуның менән тамаҡты 2-3 минут дауамында сайҡатырға. Тамаҡты йомшартыу өсөн махсус спрей һибергә, йылыта торған компрестар яһарға кәрәк. Муйынға йылытылған үҫемлек майы, спирт, 0,5 л һыуға 1 ҡалаҡ һеркә һалынған шыйыҡса менән йылытҡыс бәйләүес йәки компресс һалырға. Уны ике сәғәттән дә кәм тоторға ярамай. Ангинанан картуф ингаляцияһы ярҙам итә. Бының өсөн ваҡ картуфты алып, аҙ ғына һыуҙа картуфтан быу килгәнсе бешерергә. Уға тағы ике валидол дарыуы өҫтәргә мөмкин. Аҙаҡ бөркәнеп ултырып, быуҙы 10-15 минут танау һәм ауыҙ менән һуларға. Ингаляциянан һуң шундуҡ төрөнөп ятырға. Был процедураны иртән һәм кис ҡабатларға була. Шулай уҡ бешкән һуған һауаһы ла файҙалы. Аяҡтарҙы 15-20 минут дауамында 40-42° йылы һыуҙа тоторға ла, һыуынғас, эҫе һыу өҫтәп тағы бер аҙ йылытып, йөн ойоҡ кейеп ятып торорға;Керәнде ваҡ ҡырғыс аша үткәреп, һутын һығып алырға һәм яртылаш һыу менән болғарға. Һуңынан килеп сыҡҡан шыйыҡса менән тамаҡты сайырға.Һигеҙ эре һарымһаҡ тырнағын ҡырып, һигеҙ аш ҡалағы шарап һеркәһе ҡушып болғап, төнгөлөккә һыуытҡысҡа ҡуйып торорға. Икенсе көнгә ошо ҡатышмаға ике аш ҡалағы бал өҫтәп, бутарға. Һуңынан ике балғалаҡ ҡатнашманы ауыҙҙа иреп бөткәнсе тотоп, яйлап йоторға. Халыҡ медицинаһында төрлө үләндәр менән дауалау мөмкинлектәре киң:10 г аптека ромашкаһы, 10 грамм шалфей япрағы кәрәк була. 1 сәй ҡалағы ваҡланған үлән йыйылмаһын 1 стакан ҡайнаған һыуға һалып, 30-35 минут төнәтергә һәм аҙаҡ һөҙөп алырға. Ошо төнәтмә менән тамаҡты көнөнә 5-6 тапҡыр сайырға. Ике сөгөлдөрҙө ваҡ ҡырғыс аша үткәреп, һутын һығып алырға. Һуңынан уны талғын ғына утта 10 минут ҡайнатырға. Килеп сыҡҡан йылы дарыу менән тамаҡты көнөнә 3-4 тапҡыр сайырға кәңәш ителә.Шулай ҙа табип менән кәңәшләшергә онотмағыҙ. Фото: 24health.by