Ҡала мөхите кеше ғүмере сифатына ҙур йоғонто яһай. Ул кәйефкә, һаулыҡҡа һәм үҙеңде нисек тойоуға тәьҫир итә. Шуға күрә дәүләттең өҫтөнлөклө бурыстарының береһе булып ҡала халҡы өсөн уңайлы мөхит булдырыуҙа. Был маҡсатҡа өлгәшеү өсөн федераль проект эшләнде, ул 2024 йылға тиклем уңайлы ҡала мөхите булдырыуҙы күҙ уңында тота. Салауат ҡалаһында “Торлаҡ һәм ҡала мөхите” милли проектының “Уңайлы ҡала мөхите булдырыу” федераль программаһы буйынса иң мөһим ҡала киңлектәренең береһе – Салауат Юлаев бульварындағы аллеяны төҙөкләндергәндәр. Яңыртылған биләмәлә япмаларҙы алмаштырғандар, ял итеү өсөн урындар ойошторолған, эскәмйәләр, яҡтыртыу, яңы архитектура элементтары ҡуйғандар. Аллеяла спорт тренажерҙары һәм хәүефһеҙ япмалы балалар майҙансығы урынлаштырылған. Унда төрлө йәштәге һәм физик мөмкинлекле балалар уйнай ала. Шулай уҡ төҙөүселәр йәшелләндереү тураһында ла уйлаған: ҙур ағас үҫентеләре, ҡыуаҡлыҡтар һәм сәскәләр ултыртҡандар. Төҙөкләндереүҙән һуң аллея яңырып киткән һәм ҡала халҡының иң яратҡан ял урынына әүерелгән. Хәтерегеҙгә төшөрәбеҙ, быйыл Башҡортостанда “Уңайлы ҡала мөхите булдырыу” федераль проекты сиктәрендә 123 йәмәғәт киңлеге яңыртыласаҡ. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Салауат ҡалаһы хакимиәте.