Студенттар Башҡортостандың Юғары Судына экскурсияға барҙы

“Балаға ҡарата дуҫтарса ғәҙел хөкөм” программаһын тормошҡа ашырыуға ярашлы, Башҡортостандың Юғары Судында Өфө фән һәм технология университетының Хоҡуҡ институты студенттары өсөн экскурсия ойошторолдо. Экскурсияға Хоҡуҡ институты директоры Руслан Зәйнуллин етәкселегендә суд-прокурор эшмәкәрлеге һөнәренә уҡыған IV курс студенттары килгәйне. Башҡортостан Республикаһы судтарының берләшкән матбуғат хеҙмәте етәксеһе Вадим Хәбиров буласаҡ юристарҙы республиканың төп фемида йорто менән таныштырҙы. Студенттарға тәүҙә ҡабул итеү бүлмәһе эшмәкәрлеге тураһында һөйләнеләр. Студенттар судтарҙың электрон һаҡланған документ әйләнеше, веб-конференция, электрон сират системаларын индереү һәм ҡулланыу һәм суд эшмәкәрлеген һанлаштырыуҙың барышы менән дә танышты. Суд бинаһы менән танышып сыҡҡас, конференциялар залында Башҡортостандың Юғары Суды Рәйесе Рәил Шәйҙуллин, республиканың Судьялар Советы рәйесе урынбаҫары Йәүҙәт Иҙрисов, Беренсе инстанция суд составы рәйесе Илдар Ҡанбәков менән осрашыу үтте. Һөйләшеү асыҡ форматта барҙы. Ғәҙеллек һаҡсылары судья һөнәренең үҙенсәлектәре, был дәрәжәгә етеү өсөн ниндәй баҫҡыстар аша үтергә кәрәклеге тураһында һөйләне. Шулай уҡ йәштәрҙе суд системаһына эшкә килергә саҡырҙылар. “Һеҙҙең бында килеүегеҙ ҡыуаныслы. Хоҡуҡ нигеҙҙәрен өйрәнеү мәктәптән уҡ башланырға тейеш. Һеҙ буласаҡ юристар, һөнәрегеҙгә тап төшөрмәгеҙ. Үҙегеҙҙе суд системаһы менән бәйләгегеҙ килһә, вакансиялар бар. Киләсәктә судья булғығыҙ килһә, түбәнге баҫҡыстарҙан башлағыҙ”, – тип кәңәш бирҙе Рәил Шәйҙуллин. Рәмилә Мусина фотолары.