"Беҙҙең яугирҙәрҙең кәйефе күтәренке, үҙҙәрен ышаныслы тоталар"

Мәсетле районы хакимиәте башлығы Әнис Әсәҙуллин махсус хәрби операциялағы яҡташтарыбыҙ янында булып, гуманитар ярҙамды тапшырыуҙа үҙе ҡатнашты. Ул ошо хаҡта социаль селтәрҙәге сәхифәһендә уртаҡлашты. “Яугирҙәр өсөн улар һораған бөтә кәрәкле әйберҙәрҙе алып барҙыҡ. Улар - тепловизор, мунса өсөн мейес, иретеп йәбештереү аппараттары, бензин менән эшләгән бысҡылар, генераторҙар, газ плитәһе, электродтар, блиндаж шәмдәре, газ баллондары, көрәктәр, ҡырҡыу дисктары, медицина препараттары, шәхси гигиена саралары, аҙыҡ-түлек, йылы әйберҙәр, шул иҫәптән эске кейем, мәсетлеләр ҡулы менән эшләнгән маскировка селтәрҙәре. Яугирҙең әсәһе аҡсаһына һатып алынған еңел автомобилде алып барҙыҡ. Улар менән бергә һалдаттар мәктәп уҡыусыларының хаттарын, “Мәсетле тормошо” район гәзитен алды, улар Ватанды һаҡлаусыларға яҡты тәьҫораттар тыуҙырҙы. Тәүге посылкаларҙы Ҡазанда хәрби әҙерлек үткән артиллеристарға ҡалдырҙыҡ. Яңы Айҙар тораҡ пунктында Башҡортостан полкының ремонт ротаһында хеҙмәт иткән яугирҙәр менән осраштыҡ. Артабан Северодонецкиға юлландыҡ - был беҙҙең 21 яугиргә посылканы хәүефһеҙ тапшырыу өсөн иң яҡын нөктә. Донецкиҙа “Директор” позывнойлы яҡташыбыҙҙы осраттыҡ. Беҙҙең яугирҙәрҙең кәйефе күтәренке, үҙҙәрен ышаныслы тоталар. Һәр кем ғаиләләренә, яҡындарына һәм бөтә мәсетлеләргә изге һүҙҙәрен ебәрҙе. Уларҙан районыбыҙ тураһында яҡшы һүҙҙәр ишеттек. Яугирҙәр берҙәм тора, командирҙар уларҙың хеҙмәте тураһында фекерҙәр әйтте. Егеттәр Ватанды һаҡлай, беҙҙең бурыс – уларға ышаныслы тылды тәьмин итеү. Улар барыһы ла Геройҙар һәм беҙ уларҙың һәр береһе менән ғорурланабыҙ! Райондың битараф булмаған халҡына, эшҡыуарҙарға һәм ойошмаларға, мәктәптәргә гуманитар ярҙам йыйыуҙа күрһәткән ярҙамдары өсөн рәхмәт белдерәм”, – тип яҙған Әнис Әсәҙуллин. Фото: vk.com/feed