23 октябрҙә Кушнаренко районында, М7 трассаһында, ҡурҡыныс авария булды. ЮХХДИ-нан хәбәр итеүҙәренсә, 50 йәшлек Иглин районы кешеһе йөк машинаһына идара итеп, алдында торған “Лада Калина”ны бәрҙерә. Боролорға тип торған еңел машина ҡаршы һыҙатҡа осоп сыға һәм унда “КамАЗ”ға бәрелә. Тәүге йөк машинаһына туҡтап өлгөрмәгән өсөнсөһө килеп бәрелә. Һөҙөмтә бик аяныслы: шул урында өс кешенең ғүмере өҙөлә. Әле был кешеләрҙең кемлеге асыҡланған. Улар райондың Сәйет ауылында йәшәгәндәр. Еңел машинала 67-шәр йәшлек өйҙәш ир менән ҡатын һәм уларҙың 67 йәшлек күршеһе булған. Туғандары әйтеүенсә, улар был көндө пенсия алған һәм аҙыҡ-түлек алыр өсөн Кушнаренкоға юлланған. Ҡайтып килгән саҡта, ауылдарына боролған ерҙә генә ошо ҡурҡыныс авария булған да инде. Шулай уҡ, хәбәр ителеүенсә, еңел машинаға бәрелгән йөк машинаһы водителе арыған һәм юлда йоҡлап китә яҙған. Шуға күрә ул алдында боролор өсөн туҡтаған еңел автомобилде күрмәгән. Әле уға ҡарата енәйәт эше ҡуҙғатылған. Фото: ЮХХДИ.