Әбделмәмбәт мәктәбе яңылыҡҡа ынтылышы, заман менән бергә атлауы, белем биреүгә үҙенсәлекле ҡарашы менән айырылып тора. Шуға күрә лә тап ошо мәктәптә районыбыҙҙа беренселәрҙән булып “Кванториум” мобиль технопаркы асылыуы һис тә ғәжәп түгел.
Башҡортостанда иң беренсе мобиль технопарк 2020 йылда “Мәғариф” милли проекты сиктәрендә тормошҡа ашырыла. Ул өҫтәмә белем биреү учреждениелары булмаған алыҫ ауылдарҙағы балаларға республика бюджеты иҫәбенә фәнни-ғәмәли һәм техник йүнәлештәге программалар буйынса өҫтәмә белем алырға мәмкинселек бирә. Мобиль технопарктың маҡсаты булып уҡыусылар араһында инженерлыҡ һәм фәнни һөнәрҙәрҙең абруйын арттырыу, инженер кадрҙары әҙерләүгә булышлыҡ итеү тора.
Әбделмәмбәт мәктәбе Рәсәй кимәлендә үткән конкурсҡа ғариза нигеҙендә һайлап алына. Бөгөн иһә был мәктәптә уҡыусылар сәнәғәт дизайны, виртуаль ысынбарлыҡ, квадрокоптер һәм башҡа йүнәлештәр буйынса өҫтәлмә белем ала. Мәктәптең өс кабинетында лазер станоктары, 3D-принтерҙар, 3D-ручкалар, квадрокоптерҙар, квантумдар өсөн ҡорамалдар ҡуйылған. Дәрестәрҙе Өфө ҡалаһынан килгән белгестәр – Байназаров Ғәфүр Юлай улы, Сәләмова Гөлназ Рәсих ҡыҙы, Мингазов Руслан Флорид улы алып бара. Уҡыу ваҡытында балалар заманса ҡоролмаларҙа эшләргә өйрәнә, инновацион технологиялар уйлап табыу, һынау мөмкинлегенә эйә буласаҡ. Ҡыҫҡаһы, IT өлкәһендәге белгестәрҙең эштәре менән танышасаҡтар.
Мобиль технопаркты асыу тантанаһында район мәғариф бүлеге етәксеһе Илшат Ғаяз улы Сәйфетдинов балаларҙы шундай ҙур мөмкинлек алыуҙары менән ҡотлап изге теләктәрен еткерҙе. Мәктәп директоры Инсур Рәмил улы Үтәбаев өҫтәлмә дәрестәрҙең теҙмәһе менән таныштырҙы һәм Әбделмәмбәт мәктәбенең сәнәғәт министрлығының пилотһыҙ осоу аппараттары базаһына индерелеүе хаҡында хәбәр итте.
Тантаналы өлөштән һуң йыһазландырылған кабинеттарҙа беренсе дәрестәр башланып та китте.
Кванториум – белем биреү системаһының яңы баҫҡысы һәм балаларҙың ошо өлкәлә һәләттәрен асыуҙың бер юлы. Был проект уҡыусыларҙың белем сифатын күтәреүҙә, киләсәктә һөнәр һайлауҙа ҙур йүнәлеш бирер, яңы офоҡтар асыр.
А.Уразаева