Баш ҡалабыҙҙа этнотуризм буйынса 3-сө халыҡ-ара форум уҙғарыла, шулай уҡ уның сиктәрендә “Йыл маршруты-2023” Бөтә Рәсәй туристик премияһының финалы ла үтә. Сарала илбеҙҙең төрлө төбәктәренән, Белоруссия һәм Абхазиянан ҡунаҡтар ҡатнаша. Бөгөн “Торатау” конгресс-холында форум тантаналы рәүештә асылды. Унда Башҡортостан Башлығы Радий Хәбиров та ҡатнашты. - Өфөлә этнотуризм буйынса халыҡ-ара форумды өсөнсө тапҡыр уҙғарабыҙ. Беҙҙең республика был йәһәттән үҙенсәлекле, бында төрлө халыҡ вәкилдәре йәшәй. Иң мөһиме –улар үҙҙәренең мәҙәниәтен һәм йолаларын һаҡлай, - тине ул сығышында. Артабан “Этнотуризм - туристик биләмәләр үҫешенең драйверы” тигән темаға пленар ултырыш уҙғарылды. Башҡортостандың Эшҡыуарлыҡ һәм туризм буйынса министры урынбаҫары Азамат Ғәлин республикала туризм үҫеше менән таныштырҙы. -Башҡортостанда беҙҙең төбәгебеҙгә тартып торған урындар байтаҡ. Шүлгәнташ мәмерйәһен барып күреү тәрән тәьҫораттар ҡалдыра. Былтыр унда “Шүлгән-таш” тарихи-музей комплексын астыҡ. Яңы технологиялар ярҙамында унда кешелек цивилизацияһының барлыҡ тарихын күрергә мөмкин. Донъя кимәлендәге был комплекста 60 мең кеше булып өлгөрҙө. Әлеге көндә йәнә бер ҙур эш алып барыла. Евразияның күсмә цивилизациялар музейын төҙөү эшен башланыҡ. Ул халҡыбыҙҙың тарихын асыуға булышлыҡ итәсәк. Музейҙың төп объекттары – Хөсәйенбәк һәм Тура-хандың таш мавзолейҙары. Шулай уҡ бында башҡорт аты үҙәген, ҡунаҡханалар, һөнәрселек производствоһын, мәҙәни һәм спорт саралары өсөн майҙансыҡтар асыу ниәтләнә, - тине ул үҙ сығышында. Ултырышта Мәскәү, Санкт-Петербург, Ҡазан һәм башҡа ҡалаларҙан килгән ҡунаҡтар ҙа сарала ҡатнашыусыларға ҡыҙыҡлы мәғлүмәттәр еткерҙе. Һәр ҡайһыһы үҙенең ҡыҙыҡлы тәжрибәләре менән уртаҡлашты. Көндөң икенсе яртыһы ла йөкмәткеле һөйләшеүҙәргә ҡоролдо. “Этномәҙәнитуризм: маркетинг үҫеше һәм тәьҫораттар иҡтисады” темаһына арналған түңәрәк өҫтәлдә залдан һорау биреүселәр ҙә күп булды. Түңәрәк өҫтәлде Бөтә Рәсәй “Йыл маршруты” туристик премияһына нигеҙ һалыусы Геннадий Шаталов алып барҙы. Автор фотолары.