“Һаулыҡ һаҡлау” милли проектына ярашлы, Өфө ҡалаһының 18-се дауаханаһына амбулатор һәм стационар звено хеҙмәткәрҙәренең эш урындарын йыһазландырыу өсөн туғыҙ компьютер алынды. Хәҙер белгестәрҙең эш урындары монитор, клавиатура менән комплектланған неттоптар (бәләкәй, аҙ ҡеүәтле, өҫтәл компьютерҙары) менән йыһазландырылды. Яңы ҡорамалдар республика медицина мәғлүмәт системаһындағы эш талаптарына яуап бирә. Яңы техника ярҙамында табип пациенттарҙы ҡабул итеүгә яҙа, электрон карталарҙы алып бара, йүнәлтмәләр, льготалы рецептар әҙерләп бирә. Шулай уҡ яңы техника ярҙамында телемедицина консультациялары үткәрергә мөмкин. –Иҫке техниканы алмаштырыу һәм яңы автоматлаштырылған эш урындарын булдырыу һаулыҡ һаҡлау өлкәһендә дәүләт мәғлүмәт системаһын киң күләмдә индереү өсөн төп шарт булып тора. Шулай уҡ тулыһынса ҡағыҙһыҙ электрон документтар әйләнешенә күсеүҙә ҙур аҙым, – тине дауахананың баш табибы Наил Ғиләжетдинов. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.