Бөгөн, 22 октябрҙә, Элвин Грей (Радик Юлъяҡшин) командаһының элекке музыканты Артур Кусимовтың вафаты тураһында билдәле булды. Уны күптәр “Кусим” псевдонимы аҫтында белә ине. Ҡайғылы хәбәр егеттең “Бәйләнештә” социаль селтәрендәге рәсми сәхифәһендә баҫылған. - Бөгөн Кусимыбыҙ беҙҙе ҡалдырып китте. Ғаиләһенең һәм яҡындарының ҡайғыһын уртаҡлашабыҙ, - тип яҙылған унда. Был хаҡта шулай уҡ социаль селтәрҙәге шәхси сәхифәһендә Радик Юлъяҡшин да хәбәр иткән. “Ауыр. Ҡайғырабыҙ. Һуңғы ике йылда ул үҙенең соло проекты өҫтөндә эшләй ине. Тамамларға өлгөрмәне. Яҙмыш башҡаса хәл итте”, - тип яҙа Элвин Грей. Артур Кусимовтың үлеменең сәбәбе аныҡланмай. Уның әсәһе һәм һеңлеһе ҡалған. Музыкант менән хушлашыу 23 октябрҙә Ҡазанда үтәсәк. Артисты 24 октябрҙә тыуған яғында, Башҡортостандың Әбйәлил районы Асҡар ауылында ерләйәсәктәр. Артур Кусимов 2012 йылда Мәскәү Суворов хәрби-музыка училищеһын, 2008 йылда Өфөлә Заһир Исмәғилев исемендәге урта махсус музыка мәктәп-лицейын (хәҙер - урта махсус музыка колледжы) тамамлаған. Хәрби карьера һайлауын иһә Артур Советтар Союзы Геройы Таһир Кусимовтың яҡын туған булыуы менән аңлатҡан. 2015 йылдан Элвин Грей лейблында эшләгән, Радик Юлъяҡшиндың ижади юлында уға ҡушылған тәүге артистарҙың береһе булған. Артурҙың яҡындарының ауыр ҡайғыһын уртаҡлашабыҙ, сабырлыҡ теләйбеҙ. Фото А. Кусимовтың шәхси сәхифәһенән.