Башҡортостан Республикаһы Хөкүмәтендә “Амкодор-Ағиҙел” – уңышты йыйып алғандан һуң игенде эшкәртеү буйынса ҡорамалды сығарыу заводын төҙөү проектын уңышлы тормошҡа ашырған өсөн дәүләт наградаларын тапшырыу тантанаһы булды. Сараны Хөкүмәт Премьер-министры үткәрҙе. Андрей Назаров төбәк, ил өсөн проекттың мөһимлеге һәм уны тормошҡа ашырғанда инвесторға булышлыҡ итеүҙең уникаль инструменттарының файҙаланыуы тураһында һөйләне. Һәр йәһәттән ярҙам күрһәтелгән. Завод бәләкәй хужалыҡтарға, ҙур аграр холдингтарына импортты алмаштырыу мөмкинлеген биргән заманса иген киптереү комплекстарын тулыһынса сығарыуға әҙер. - 2021 йылдың декабрендә Беларуста сәфәрҙә булғанда белорус предприятиеларының береһен локалләштереү тураһында килешкәйнек кенә. Был ҙур, мөһим булһа ла, шәп атҡарылыр эш булып күренмәне. Бер йылдан кәмерәк ваҡытта Петербург халыҡ-ара иҡтисади форумында килешеүгә ҡул ҡуйылды, ә 2022 йылдың көҙөндә беренсе таш һалынды. Туғыҙ айҙан һуң предприятиеға старт бирелде. Проектты төҙөүселәргә, инженерҙарға, төҙөүселәргә, менеджерҙарға һәм ошо проектты барлыҡҡа килтергәндәрҙең барыһына ла ҙур рәхмәт. Был барлыҡ инвесторҙар өсөн йүнәлеш тә, – тине Андрей Назаров. 13 кеше дәүләт наградаһына лайыҡ булды. Дүрт кешегә “Башҡортостан Республикаһының атҡаҙанған төҙөүсеһе” тигән маҡтаулы исем бирелде. Премьер-министр процеста ҡатнашыусыларҙың барыһына ла рәхмәт әйтте һәм алда эштең күплеге, “Өфө” индустриаль паркындағы заводтың өс яҡлы килешеү сигендәге хеҙмәттәшлектең беренсе этабы икәнлеге тураһында белдерҙе. 10 октябрҙә, “Амкодор-Ағиҙел” сафҡа ингәндә, Беларусь Премьер-министры Роман Головченко һәм “Амкодор” етәкселеге тарафынан “Алға” йылдам иҡтисади биләмәһендә яңы етештереүҙе сафҡа индереү тураһында килешелде. - Был – масштаблы, технологик йәһәттән ҡатмарлы һәм 37 меңдән ашыу квадрат метр майҙанлы заманса завод. Тәгәрмәсле экскаваторҙар, автогрейдерҙар, бульдозерҙар һәм башҡа махсус техника етештерәсәктәр, - тине Премьер-министр. Завод төҙөлөшө проекты тураһында Башҡортостандың Үҫеш корпорацияһы генераль директоры Наил Ғәббәсов һөйләне. Республиканың торлаҡ-коммуналь хужалыҡ министры вазифаһын башҡарыусы Ирина Голованова “Амкодор-Алға” заводының продукцияны һатыу ҡеүәте тураһында бәйән итте. Осрашыуҙы тамамлап, Андрей Назаров тап юғары технологиялы машина төҙөү етештереүҙең бөгөн сәнәғәт сәйәсәтенең өҫтөнлөгө икәнлеген билдәләне. Фото, сығанаҡ: pravitelstvorb.ru/news/22030/