Йәш депутаттарҙың күҙҙәре яна

Бөгөн Рәсәй Федерация Советының Фән, мәғариф һәм мәҙәниәт буйынса комитеты рәйесе Лилиә Ғүмәрова йәмәғәт ярҙамы штабында депутаттар менән осрашты. Улар – Дәүләт Йыйылышы – Ҡоролтайға әле яңы ғына һайланған йәш парламентарийҙар. Аралашыу формаль булмаған мөхиттә үтте, йәш депутаттар сенаторға үҙҙәрен борсоған һорауҙарын бирҙе һәм ҡыҙыҡлы тип тапҡан тәҡдимдәрен индерҙе. Осрашыуҙа фехтование буйынса олимпия чемпионы Аделина Заһиҙуллина, Рәми Ғарипов исемендәге 1-се башҡорт республика гимназия интернаты директоры Илнур Сәлихов, йырсы Рәмил Бадамшин, “Берҙәм Рәсәй” гәзите вәкиле Елена Арямнова һәм башҡалар ҡатнашты. – Был минең яңы ғына һайланған йәш парламентарийҙар менән тәүге осрашыуым. Быйыл беҙҙең Дәүләт Йыйылышы – Ҡоролтай депутаттарының уртаса йәше ныҡ ҡына йәшәрҙе. Элек ул 60-тан күберәк булһа, әле - 49. Яңы составтағы депутаттарҙың 19-ы – 35 йәшкә тиклемгеләр, – тине Лилиә Салауат ҡыҙы. Һөйләшеү барышында төрлө темалар күтәрелде. Айырыуса мәғариф, уҡытыусылар, уҡыу йорттарын ремонтлау, мәҙәниәт темаһы мөһим булды. Был аңлашыла ла – Лилиә Салауат ҡыҙы Федерация Советында тап фән, мәҙәниәт һәм мәғариф йүнәлешен алып бара. Тәү сиратта уҡытыусыһы һөнәренең абруйын күтәрергә кәрәк тигән мәсьәлә күтәрелде. – Һөнәрҙең абруйы бик күп факторҙарҙан барлыҡҡа килә. Эш мөхите инфраструктураһынын башлап, йәмғиәттә булдырылған педагог образына тиклем. Милли проекттар ярҙамында инфраструктура яҡшыра. Мәктәптәр төҙөлә һәм ремонтлана. Тик иң ҙур мәсьәлә – эш хаҡы. Президент указына ярашлы, уҡытыусының эш хаҡы төбәктәге уртаса эш хаҡынан кәм булмаҫҡа тейеш. Тик ысынбарлыҡта уҡытыусылар эш кимәлен арттырып ҡына хеҙмәт хаҡын тигеҙләй ала, – тине ул. Был йәһәттән Лилиә Салауат ҡыҙы әйтеүенсә, педагогик хеҙмәткәрҙәрҙең эш хаҡын формалаштырыуға яңы ҡараш булдырылған. Оҙаҡламай улар эшләй башларға тейеш. Рәми Ғарипов исемендәге 1-се башҡорт республика гимназия интернаты директоры Илнур Сәлихов кадрҙар проблемаһына туҡталды. Уны хәл итеү өсөн уҡытыусылар өсөн социаль пакетты киңәйтергә тәҡдим итте. Мәҫәлән, педагогтар өсөн махсус ипотека программалары булдырыу. Сенатор был идеяны ҡыҙыҡһынып тыңланы һәм иғтибарға алырға вәғәҙә бирҙе. Депутат Алексей Локотченко милли символиканы законһыҙ файҙаланыу тураһында һорау бирҙе. – Беҙ был туралағы законды эшләнек һәм ҡабул иттек, уға ярашлы объект йәки тауарҙың географик билдәләнеше яҡланасаҡ. Мәҫәлән, Мәскәүҙә етештерелгән сәй, “башҡорт сәйе” тип атала алмаясаҡ. Был - төбәктең абруйы мәсьәләһе. Башҡортостанда башҡорт аты, башҡорт балы, башҡорт ҡурайы тигән брендтар теркәлгән. Киләсәктә “башҡорт ҡымыҙы” теркәлергә тейеш. Бөтә донъяла етештерелгән урыны күрһәтелгән тауарҙар ҡиммәтерәк тора, һәм был - сифат гарантияһы, – тине Лилиә Ғүмәрова. Һөйләшеү бик ҡыҙыҡлы һәм файҙалы булды. Йәштәр аратабан да сенатор менән осрашырға теләк белдерҙе. – Йәш депутаттарҙың күҙҙәре янып тора. Улар кеше проблемаларына битараф түгел. Был бик яҡшы күренеш. Уларҙың ҡыҙыҡлы идеялары һәм тәҡдимдәре бар, мин уларҙы иғтибарға алдым, – тине Лилиә Салауат ҡыҙы. Автор фотолары.