Онотмайбыҙ...

19 октябрҙә Өфөлә күренекле композитор Салауат Низаметдиновҡа мемориаль таҡтаташ асылды. Сарала Башҡортостандың Композиторҙар союзы рәйесе Ләйлә Исмәғилева, Мәҙәниәт министрлығының профессиональ сәнғәт бүлеге начальнигы Гүзәл Сөләймәнова, Рәсәй Инвалидтар спорт союзы президенты, Дәүләт йыйылышы депутаты Флүр Нурлығаянов, Хор капеллаһы етәксеһе Алһыу Хәсбиуллина, Республиканың мәҙәниәт һәм сәнғәт эшмәкәрҙәре, композиторҙың ҡатыны Рәзидә Низаметдинова, ҡыҙы Ләйсән һәм уның яҡындары ҡатнашты. Башҡорт һәм рус телдәрендә яҙылған мемориаль таҡтаташ Ленин урамындағы 162-се йорт фасадына ҡуйылған, унда композитор 1997 йылдан 2003 йылға тиклем ғаиләһе менән йәшәгән. Киләсәктә Өфө скверҙарының береһенә композиторҙың исемен биреү планлаштырыла. Шулай уҡ 14 декабрҙә Башҡорт опера һәм балет театрында «Ай тотолған төндә» операһының премьераһы буласаҡ. Салауат Әхмәҙи улы Низаметдинов 1957 йылдың 3 мартында Учалы районының Миндәк ауылында күп балалы шахтер ғаиләһендә тыуған. Ете йәшендә ул Өфөнөң һуҡыр балалар өсөн мәктәп-интернатына бирелә. Малай өсөн иң ҙур шатлыҡ музыка менән шөғөлләнеү була. Ул интернат хорында йырлай, музыка ҡоралдарын – баян, домра, кларнет, торбаны ҡыҙыҡһынып үҙләштерә. 11 йәш тулғас, уны яңы ғына асылған 1-се балалар музыка мәктәбенең баян һәм композиция класы буйынса филиалына ҡабул итәләр. 1977 йылда Өфө сәнғәт институтында уның менән йәмәғәт башланғысында композиция кафедраһы доценты Евгений Земцов шөғөлләнә башлай. Ул, шиғриәтте бик яҡшы белгән кеше, йәш композиторҙа шиғырҙарға һөйөү уята. Тәжрибәле педагог йоғонтоһо аҫтында Салауат Низаметдинов күп ижад итә башлай. Был уны беренсе етди еңеүгә килтерә: 1979 йылда Прагала халыҡ-ара һуҡыр композиторҙар конкурсында Александр Блок шиғырҙарына романстар өсөн өсөнсө премияға лайыҡ була. Һуңыраҡ, 1988 йылда, шул уҡ конкурста Салауат Низаметдинов шағирә Ника Турбина шиғырҙарына «Черновик» вокаль циклы өсөн икенсе премияға лайыҡ була. Сәнғәт институтын тамамлағандан һуң композитор Гнесиндар исемендәге Мәскәү дәүләт музыкаль-педагогия институтының (хәҙер Рәсәй музыка академияһы) аспирантураһына уҡырға инә, унда профессор Генрих Литинскийҙа уҡый, һуңынан уға До-минор Ҡыллы квартетын бағышлай. 1983 йылда Салауат Низаметдиновты СССР композиторҙар Союзына ҡабул итәләр, ә 1988 йылда ул «Салауат менән һөйләшеү» вокаль симфонияһы өсөн СССР халыҡ хужалығы ҡаҙаныштары күргәҙмәһенең алтын миҙалын ала.