“Һаулыҡ һаҡлау” милли проектының тәүге медицина звеноһын яңыртыу программаһына ярашлы, Асҡын районының Яңы Бағазы ауылында модулле фельдшер-акушерлыҡ пункты төҙөлә. Маҡсаты – халыҡҡа медицина ярҙамын йәшәгән урынында ойоштороу, тәүге ярҙам алыу мөмкинлеген арттырыу. Әле төҙөүселәр бинаның металл конструкцияларын күтәрә, модулдәр һәм ҡыйыҡ урынлаштырыла. Яңы медицина бинаһы һыу үткәргес һәм канализация системаларына тоташтырыла. Шулай уҡ ул тейешле заманса техник ҡорамалдар менән йыһазландырыласаҡ. Яңы фельдшер-акушерлыҡ пунктында Зәлифә Шәрифғәлиева пациенттарҙы ҡабул итәсәк. – Яңы фельдшер-акушерлыҡ пункты асылыуын байғазылар күптән көтә. Оҙаҡламай улар сифатлы һәм профессиональ медицина ярҙамын алыу мөмкинлегенә эйә буласаҡ, бинаны асыу тантанаһына күп ҡалманы, – ти Асҡын үҙәк район дауаханаһының баш табибы Вадим Ғәләүетдинов. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.