Йәш ғаилә Себерҙән ауылға ҡайтып малсылыҡҡа тотона

Миәкә районының Илсеғол ауылында йәшәүсе Әлиә менән Марсель тәүҙә ситкә сығып китһәләр ҙә, ят тарафтарҙы үҙ итмәй күңелдәре, тыуған ауылдарына тартыла. Себерҙәге донъялары, эштәре яйға һалынһа ла Илсеғолға ҡайтып яңы тормош башлайҙар. Тыуған ереңдә лә матур итеп йәшәүҙең өлгөһөн күрһәтәләр, тормош мәшәҡәттәренә зарланмай, матур итеп балалар тәрбиәләйҙәр. Өлкән ҡыҙҙары Диана – X класта уҡый, уртансылары Элина быйыл I-сегә барған, кеселәре Айлина бер йәшлек. Икеһе лә Илсеғолдоҡо Йәнтүриндар, ауылға ҡайтырбыҙ тигән хыял да тәүҙән үк булғанға, Себерҙә йәшәгән мәлдә үк йорт һала башлайҙар. Яйлап мал ҡураһы, гараж да барлыҡҡа килә. Хатта төрлө емеш ағастарын-ҡыуаҡтарын да улар үҙҙәре ҡайтҡансы уҡ ултыртып ҡуя. – Атай-әсәй , туғандар эргәһенә ҡайтып улар менән бергәләп йәшәйһе килде. Беҙ ҡайтҡанда атайым да иҫән ине әле. Беҙҙең ауылға ҡайтыуға ул бик шатланды. Бер туған апайҙарым ауылда төпләнгәс, мине лә ҡайтараһы килә ине. Ауылда эш күп икәнлеген белә инек, ауырлыҡтар ҙа ҡурҡытманы. Иптәшем дә мал-тыуар тоторбоҙ тип эшкә дәртләнеп ҡайтты. Ҡайтҡаныбыҙға бер ҙә үкенгән юҡ, – тип һөйләне Әлиә. – Үҙебеҙҙең Дим буйы, шишмәләре нисек һағындырмаһын? Ауылға ашҡынып ҡайттыҡ , – тип ҡушылды әңгәмәгә Марсель. Ғаилә башлығының үҙенең техникаһы булыуы бесән әҙерләү мәшәҡәттәрен еңеләйтә. Ул ғына ла түгел ауылдаштарына ла ярҙам итеп өлгөрә. Һыйырҙарының ғына һаны һигеҙгә етә, уларҙың бишәүсе һауын һыйырҙары. Эргәлә генә Дим йылғаһы аҡҡас ҡош-ҡорт тотоу өсөн дә уңайлы. Быйыл 60 баш ҡаҙ үҫтергәндәр, алдағы йылдарҙа уларҙың һаны 100 -гә еткән. Үҙҙәренән артҡанын һатып файҙа килтерәләр. Ҡаҙ һуйыу өмәһе лә бер байрамға әүерелә.Күмәк кешегә эш сыҙамай. Туғандар бергәләп йыйылып эште башҡарып ҡуялар. Ғөмүмән, бер-береһенә ярҙамсыллыҡ хас был нәҫелгә. –Ҡунаҡта лә, эштә лә туғандар менән бергәбеҙ. Шуға донъя көтөүе лә еңелерәк. Йыраҡҡа ҡунаҡҡа китһәк тә, донъябыҙҙы апайҙарыбыҙға ҡалдырабыҙ, –тиҙәр Йәнтүриндар. Бөгөнгө заманда ҡайһылар мал ҡарау отошло түгел тиһә лә, был ғаилә эшһеҙ тороуға күнмәй, аҡса эшләү юлдарын таба белә. Бының өсөн бары эштән ҡурҡмаҫҡа кәрәк. – Иртәнге алтынсы яртыла торабыҙ ҙа, аппарат менән тиҙ һыйырҙарҙы һауып сығабыҙ. Шуға эш еңелерәк. Һөттө тапшырып аҡса эшләйбеҙ, – ти йүнсел ғаилә. Үҙ-ара аңлашыу, йылылыҡ булғанға,бер-береһен ҡәҙерләп йәшәгәнгә лә уларҙың донъяларынан ҡот, нур бөркөп тора. Автор фотолары.