"Безнең авылда да бар андый гаилә. Аларның "маҗараларын" авыл белән күзәтәбез".
"Авыл җирендә дә “Санта-Барбара” кебек мәхәббәт маҗаралары булып ятарга мөмкин икән, җәмәгать. Бәян итим әле...
Резедә Ленарга йөкле килеш кияүгә чыкты. 18 яшендә. Менә-менә бала табарга торган киленне егетнең әти-әнисе өйләренә алып кайтып утыртты.
Авылда гайбәт тиз тарала икән шул. Гәрчә Ленар әти-әниләренең "өйләнергә кирәк" дигән сүзләренә каршы килеп тә караган. Авылда абруйлы укытучылар гаиләсеннән ул. Әти-әнисе, безнең йөзебезгә кызыллык китермә, дип каты торган.
Резедә Ленар белән йорт төзеп чыктылар. Әфганда хезмәт итеп кайткан ир кайчак өйдә давыл туздыра иде. Түз генә. Юк кына сәбәп табып та хатынына пычак, яки балта белән ташлана. Күпме йодрык татыды бәхетсез хатын. Әмма түзде. Бала кечкенә, авыру әнисе янында энесе бар. Кире кайтып та карады. Тик каенана белән каенатасы: “Кеше көлдереп йөрмәгез”, – дип кире килеп алды.
Ленарның ике йорт аша күршеләре Гөлсирә белән очраша башлаган икән, дигән имеш-мимешләр ишетелә башлады. Ул төс-биткә бик чибәр хатын, менә дигән ире, ике баласы бар. Резедә исә иренең өйдән чыгып китеп, читтә йөрүен бик авыр кичерде. Гөлсирәнең ире шабашкага йөри, ул китте исә Ленар кичкырын сөяркәсе янына чаба. Иренең артыннан барып, ялварып та карады, елады хатын. Гөлсирә белән дә сөйләшеп аңлашырга маташты. Әти-әнисенең тавышлануын ишетеп елаган баланы да ишетмәде йөремсәк ир.
Берсендә түзмәгән, көтүдән кайтучы сыерын каршы алырга килгән Гөлсирәне күреп, Резедә аңа ташланган. Ике хатын чын-чынлап чәчләрен йолкышып сугышкан. Шунда Резедә: «Рәхәт күрмә, син иремнең сөяркәсе булдыңмы, аны миннән тартып алдыңмы, вакыт узар, мин иреңне синнән тартып алырмын», – дигән.
Ленар белән Гөлсирә кача-поса шулай биш ел чамасы очрашты бугай. Бермәлне Гөлсирә иренең үзенә карата үзгәрүен сизеп, артыннан күзәтә башлый. Резедә белән ирен район үзәгендә күреп, чыгырыннан чыга ул. Ә бит ире аңа командировкага китәм, дип сөйләнгән иде. Өенә кайткач, ну тузды Гөлсирә. Резедәләрнең йорт тәрәзәләрен таш атып ватты. Ире кайткач, аңа ямьсез сүзләр әйтеп акырды, бакырды. Моны ишеткән авылдашлар кызганмады Гөлсирәне. Ә Ленар хатынының читкә йөрүен ишеткәч, әйберләрен җыйды да шәһәргә чыгып китте".
Менә шундый гаиләләр һәр авылда дип әйтерлек була икән ул.