«Йәштәргә һәр саҡ юл асыҡ» — иҫке совет кинофильмынан алынған был юлдар барыһына ла таныштыр, моғайын. Әммә был формула аяуһыҙ конкуренция закондары буйынса йәшәгән эшлекле мөхиттә һәр ваҡыт эшләмәй. Тап шуның өсөн дә эшҡыуарҙар ярҙамға мохтаж, бигерәк тә башланғыс этапта. Бөгөн мин һеҙгә «Бәләкәй һәм урта эшҡыуарлыҡ, шәхси эшҡыуарлыҡ башланғысына булышлыҡ итеү» милли проекты сиктәрендә грант программаһы тураһында һөйләгем килә. Ул үҙ эшен башлаған 14 йәштән 25 йәшкә тиклемге йәштәр өсөн тәғәйенләнгән. Республикабыҙҙа ундай эшһөйәр, һәләтле кешеләр байтаҡ, йыл һайын йәш эшҡыуарҙар һаны арта ғына бара. Бөгөн мин һеҙҙе шундайҙарҙың береһе — Ҡырмыҫҡалы районынан Азамат Ураҙғолов менән таныштырырға теләйем. Азамат «Молот» тхэквондо буйынса балалар клубтары селтәрен ойоштора. Тәүге клубын Азамат 2021 йылда Архангел ауылында аса. Бөгөнгө көндә клубтың бөтә республика буйынса 12 филиалы бар, унда 400-ҙән ашыу бала, шул иҫәптән мөмкинлектәре сикләнгәндәр шөғөлләнә. Спортсылар төрлө кимәлдәге ярыштарҙа даими ҡатнаша һәм призлы урындар яулай. Йыл һайын спорт лагерҙары үткәрелә. Азамат ғариза биргән һәм 500 мең һумлыҡ федераль грант алған. Был аҡсаға Ул Стәрлетамаҡ районының Отрадовка ауылындағы клуб өсөн яңы ҡорамалдар һатып алған. Билдәләп үтергә кәрәк, быйыл республикабыҙҙан 264 йәш эшҡыуар милли проект сиктәрендә финанс ярҙамы алды. Грант программаһында ҡатнашыуҙың төп шарттары булып, проект хаҡының кәм тигәндә 25 процентын үҙаллы финансларға, шулай уҡ «Минең эшем» үҙәктәренең береһендә бушлай уҡытыу үтергә әҙер булыу тора. Тулыраҡ мәғлүмәт менән республиканың Эшҡыуарлыҡ һәм туризм министрлығының рәсми ресурстары тураһында танышырға мөмкин. Ял көндәре – фекерҙәрегеҙҙе туплап, грантҡа ғариза әҙерләү – бизнесығыҙҙы үҫтереү өсөн тағы бер аҙым яһарға, тимәк, маҡсатҡа табан бер аҙым яһарға ваҡыт. Ялдарығыҙ имен үтһен!”, - тип яҙа социаль селтәрҙәрҙәге сәхифәһендә Башҡортостан Хөкүмәте Премьер-министры Андрей Назаров. Фотолар Андрей Назаровтың социаль селтәрҙәрҙәге сәхифәһенән алынды.