Әсәй-өләсәйҙәр һәр саҡ кинәйәле һүҙ, әйтем-мәҡәл менән һүҙ һөйләне бит. Уларҙың ҡаҙанға бәйлеһе менән күп кенә ҡыҙыҡ хәлдәр ҙә булғылаған. Түбәндә социаль селтәрҙәге шул мәҙәктәрҙең бер нисәүһе. ...Әсәйем ғүмер буйы һатыусы булып эшләне. Ул ваҡытта беҙҙең Килдеғол ауылы магазины (Бөрйән районы, ахыры - АВТОР) гөрләп эшләп торған магазиндарҙың береһе ине. Беҙ, биш бала, бер-беребеҙҙе ҡарашып, татыу булып үҫтек. Бер ваҡыт, өйҙә толҡа тапмай киткәнбеҙме, бөтәбеҙ ҙә магазинға йыйылғанбыҙ. Әсәйем үтә ҡаты бәрелмәй торғайны беҙгә, әйтерен йә кинәйәләп, йә мәҡәл менән генә әйтер ине. Был юлы ла: - Аһ, өйҙәге ҡаҙанды ла алып килһәгеҙ ни була? Ҡаҙан ғына ҡалған бит, - тине. Беҙ, өлкәнерәктәр, уңайһыҙланып, улай-былай ҡаранған арала Мәймүнә исемле һеңлебеҙ сығып та китте. Беҙ тороп ҡалдыҡ, күрәһең, берәй тәмлекәс тә өмөт иткәнбеҙҙер инде. Бер ваҡыт Мәймүнә кире килеп инде. Һатып алыусыларҙың алдына барып баҫты ла әсәйемә шыбырҙап ҡына:- Әсәй, ҡаҙан буш түгел, - тине. Магазин көлөү тауышынан геү-ү-ү итеп ҡалды, ә беҙ оялыштан сығып ҡастыҡ. Магазинға эйәртенешеп йөрөмәҫкә һабаҡ булды был беҙгә. *** ...Ул ҡаҙан тарихы минең ирем менән дә булған. Беренсе класта уҡып йөрөгән. Дәрестән ҡайтһа, өйҙә берәү ҙә юҡ ти. Киткән өләсәһенә. Әсәһе бөтә балалары менән унда сәй эсәләр икән. Был килеп ингәс, өйҙәге ҡаҙанды алып килер кәрәк ине, тигәндәр. Ул йүгереп сығып киткән дә, һыуын бушатып, ҡаҙанды һурып алып, санаға һалып алып килгән бит. Килеп ингәс, тегеләр тәгәрәшеп йөрөп көлә башлаған икән, сығып ҡасҡан. Ҡәйнәмә эш булған. Ҡыш көнө саҡ балсыҡ табып, ҡаҙанды кире урынына ултыртҡан. (Зөлфиә Рахманғолова). *** ...Минең дә шул ҡаҙан менән булған хәтирә иҫемә төштө. Өләсәйем, еңгәм ауыл осонда Хәмиҙә әбейҙә ҡунаҡта булған. Бер ваҡыт ейәндәре уларҙың артынан килгән. Өләсәйем дә һәр саҡ мәҡәл менән һөйләй торғайны. Ул: "Ниңә эт менән бесәйҙе ҡалдырҙығыҙ? Ҡаҙанды ла алып килер инегеҙ", - тигән. Шулай тип әйткәс, балалар ҡайтып киткән. Ҡунаҡ бөткәс, үҙҙәре ҡайтырға сыҡһа, теге балалар тыштағы аласыҡтан ҡаҙанды аҡтарып алып, санаға ултыртып, үҙҙәре тас ҡором булып, этте бәйҙән ысҡындырып, бесәйҙе ҡосаҡлап килеп ултыра ти. (Рима Йосопова). Ә һеҙҙә мейескә, ҡаҙанға бәйле ниндәй хәтирәләр һаҡлана? Комментарийҙарҙа уртаҡлашығыҙ әле! Сығанаҡ: https://vk.com/im?sel=166873706&w=wall-156185659_5805%2F3f6cf54e4552191f6b Фото: https://tsk-service.ru