Азат Бадранов аныҡ бурыстар ҡуйҙы

Махсус хәрби операциянан ҡыҫҡа ваҡытлы ялға ҡайтҡан Азат Бадранов кисә журналистар, тарихсылар, яҙыусылар менән осрашты. Билдәле булыуынса, Башҡортостан Хөкүмәте Премьер-министрының беренсе урынбаҫары Азат Шамил улы былтыр көҙҙән алғы һыҙыҡта. Осрашыуҙа һүҙ махсус хәрби операцияла ҡатнашҡан яҡташтарыбыҙҙың батырлығын, иҫтәлеген мәңгеләштереү хаҡында барҙы. Алғы һыҙыҡта республиканың һәр ҡала-районынан яугирҙәр бар, улар төрлө милләттән, төрлө йәштә. Әммә бөтәһе лә тыуған төйәгенең патриоттары, ил именлеге өсөн ҡулына ҡорал алған ҡаһармандар. Азат Бадранов яҡташ яугирҙәребеҙ, уларҙың яҙмышы, батырлыҡтары тураһында халыҡҡа теүәл һәм аныҡ мәғлүмәт еткереү, уларҙың исемдәрен мәңгеләштереү бурысын ҡуйҙы. Был эште әҙәби әҫәрҙәр, матбуғат баҫмалары, теле-радио тапшырыуҙар аша алып барыу, музей фонды туплау мөһим. Журналистар, яҙыусылар, тарихсылар бурысты тормошҡа ашырыу буйынса үҙ тәҡдимдәрен еткерҙе. Осрашыуҙа махсус хәрби операция биләмеһендә эшләп ҡайтҡан журналистар ҡатнашты. Был һөйләшеү һөҙөмтәләре буйынса эш стратегияһы ҡабул ителә һәм Башҡортостан Башлығы Радий Хәбировҡа тәҡдим ителәсәк. Ә журналистар һәм яҙыусылар алғы һыҙыҡтағы хәл-ваҡиғаларҙы үҙ күҙҙәре менән күреп халыҡҡа еткерә алһын өсөн Донбассҡа сәфәрҙәрҙе йышыраҡ ойоштороу күҙаллана. Алғы һыҙыҡта булып ҡайтҡандар был фекер менән риза. – Егеттәрҙең ундағы йәшәйешен үҙ күҙҙәребеҙ менән күрер өсөн улар менән бергә йәшәнек, окоп тормошоноң нимә икәнен аңларға тырыштыҡ. Һалдаттар менән бергә ултырып бутҡа ашаныҡ. Шунан сығып ҡына ысынбарлыҡты күрһәтә алдыҡ. Беҙҙең команда унда ике аҙна самаһы эшләне һәм барыһын да үҙҙәре күреп, инанып ҡайтты. Барып ҡайтҡас баҫма матбуғат журналистары ундағы ысынбарлыҡты яҙып сығара башланы, – тине Башҡортостан Журналистар союзы рәйесе, “Башҡортостан” гәзитенең баш мөхәррире, ике аҙнала МХО-ла командировкала булған Вәдүт Исхаҡов. Яҙыусы, “Ағиҙел” журналының баш мөхәррире Мөнир Ҡунафин да унда булды һәм тәьҫораттары менән уртаҡлашты. – Йәнле һөйләшеү булды. Ғөмүмән, ҡайҙа Азат Шамил улы бар, шунда тормош ҡайнап тора. Махсус хәрби операцияла ҡатнашҡан егеттәрҙе тарихта мәңгеләштереү буйынса эш алып барылырға тейеш. Беҙ командировка ваҡытында улар менән яҡындан таныштыҡ. Барыһы ла тыуған илен яратҡан, батыр, ҡыйыу, йәндәрен бирергә әҙер кешеләр, мотлаҡ рәүештә уларҙы тарихта ҡалдырырға тейешбеҙ, – тине ул. Азат Бадранов шул уҡ көндө махсус хәрби операция биләмәһенән ҡыҫҡа ваҡытлы ялға ҡайтҡан егеттәр менән дә осрашты. Һөйләшеү М. Солтанова исемендәге мәҙрәсәлә үтте. Дини учреждение яугирҙәр өсөн күркәм табын да ойошторған. Азат Шамил улы уларға хәстәрлек өсөн рәхмәт белдерҙе. Ғөмүмән, бында егетәрҙең именлеге өсөн йыш ҡына ҡорбан салалар, алғы һыҙыҡта йөрөгәндәр исемәнә доғалар ҡылалар. Был әлбиттә, егеттәргә көс бирә, ышаныс өҫтәй. – Ышаныс беҙгә эште дауам итеү һәм иҫән ҡалыуға көс бирә. Мәрйәм Солтанова исемендәге мәҙрәсә беренсе тапҡыр ғына ярҙам тәҡдим итеп сыҡмай. Былтыр ҙа ошонда ҡорбан үткәргәйнек. Быйыл да тәҡдим иттеләр, йыйылайыҡ, ҡорбан салайыҡ доғалар ҡылайыҡ тинеләр. Мин, үҙем дә махсус хәрби операция биләмәһендә йөрөгән кеше, бындай башланғыстан ситтә ҡала алмайым әлбиттә, – тине Азат Бадранов. Башҡортостан мосолмандары Диниә назараты рәйесе Айнур Бирғәлин дә үҙ фекерҙәре менән уртаҡлашты. – Ҡөрьәндә шулай тип әйтелә: бер ниндәй ҙә еңеү юҡ, тик Аллаһы Тәғәләнән генә еңеү булмаһа. Әйҙәгеҙ бергәләп доғалар ҡылайыҡ, егеттәргә именлек теләйек. Беҙ хаҡиҡәт, дөрөҫлөк өсөн, ислам ҡанундары, дини ҡанундар ныҡ булһын өсөн көрәшәбеҙ. Аллаһы Тәғәлә рөхсәте менән беҙ еңеп сығасаҡбыҙ, иншааллаһ, – тине ул. Фото: Эдуард Ҡусҡарбәков.