Башҡортостан Хөкүмәте Премьер-министры Андрей Назаров Өфөлә донъя кимәлендәге Евразия фәнни-мәғариф үҙәгенең вуз-ара студенттар кампусы төҙөлөшө буйынса сираттағы кәңәшмәне үткәрҙе. Хөкүмәт Премьер-министры ведомстволар, төҙөлөш һәм архитектура ойошмалары етәкселәре, вәкилдәре менән берлектә проектты тормошҡа ашырыуҙың Рәсәй Фән һәм юғары белем министрлығы тарафынан раҫланған “юл картаһы” тураһында һөйләште. Беренсе контроль нөктә проекттың социаль-иҡтисади һөҙөмтәләренең планлы әһәмиәтен үҙ эсенә ала. Вуз-ара студенттар кампусы буйынса октябргә 48 контроль нөктә теркәлгән, уларҙың 41-е атҡарылған. - Проект буйынса “юл картаһы”ның контроль нөктәләрен атҡарыуҙы контроль аҫтында дауам итергә һәм август-сентябрҙә барлыҡ тамамланмаған нөктәләрҙе айырым контролдә тоторға кәрәк, - тине Андрей Назаров. – Архитектура, дизайнер ҡарарҙары, күтәреү тиҙлеге буйынса беҙ илдә лидер һәм планлаштырылған ваҡыттан ҡалмаҫҡа тейешбеҙ. Объектты файҙаланыуға тапшырыуға ике ай ҡалды, тип хәтерегеҙгә төшөрәм. Артабан Премьер-министр төҙөлөш өлөшө проект офисы етәксеһе урынбаҫары, “Кампус” яуаплылығы сикләнгән йәмғиәте директоры Сыңғыҙ Хәсәновтың кампустың беренсе сиратын үҙгәртеп ҡороу буйынса төҙөлөш эштәре тураһындағы дкладын иғтибар менән тыңланы. Андрей Назаров бөгөн бина конструкцияларын, колонналарын, япмаларҙы һәм монолит стеналарҙы нығытыу буйынса эштәрҙең тамамланыуы, шулай уҡ гидроизоляция эштәренең атҡарылыуы, грунттарҙың нығытылыуы тураһында әйтте. Биналарға йылылыҡ үткәрелгән, елләтеү системаһы һәм электр менән тәьмин ителгән. - Беренсе сираттағы объекттарҙың әҙерлеге 74 процент тәшкил итә, биналарҙа биҙәкләү эштәре бара ла инде. Объектҡа 500 төрлө белгес йәлеп ителгән, - тине Премьер-министр. Кәңәшмәлә шулай уҡ икенсе сиратты тормошҡа ашырыу барышы ҡаралды. Бында һүтелергә тейешле ҡоролмалар – ятаҡ, гараж, архив бинаһы һәм теплица демонтажланған. Өфө фән һәм технологиялар университеты корпусы эргәһендәге элекке завод бинаһын һүтеү эше 40 процентҡа атҡарылған. Бөгөн йылылыҡ трассаларын һалыу бара – дөйөм эштәрҙең 45 проценты һәм селтәрҙәрҙе сығарыуҙы проектлау атҡарылған. Кәңәшмәне тамамлап, унда ҡатнашыусылар интерактив биҙәү проекты, шулай уҡ мультимедиалы ҡорамалдарҙы ташыу тураһында фекер алышты. Әйткәндәй, кампус төҙөлөшө Рәсәй Президенты Владимир Путиндың ҡушыуы һәм “Фән һәм университеттар” милли проектын тормошҡа ашырыуға ярашлы атҡарыла. Фото, сығанаҡ: pravitelstvorb.ru/news/21963/