Сарала Өфөнән 12 яҙыусы һәм мәҙәниәт хеҙмәткәре, республика әҙәби баҫмалар мөхәррирҙәре ҡатнашты. Улар ике республика араһындағы мәҙәни дуҫлыҡты нығытыуға йүнәлтелгән эшлекле осрашыуҙар үткәрҙе. “Бер нисә “түңәрәк өҫтәл”, шул иҫәптән “Башҡорт яҙыусылары – белорус ере һаҡсылары” тигән темаға, тәржемә, берҙәм проекттар һәм башҡалар тураһында һөйләштеләр. Өс көнлөк программа төрлө сараларға бай булды. Беларусь Милли китапханаһының Милли музейын ҡаранылар, Минск тураһындағы документаль фильмды төшөрөүҙә ҡатнаштылар, китапханаға башҡорт һәм рус телендәге уникаль баҫмаларҙы бүләк иттеләр. Бүләктәрҙе китапхана директоры урынбаҫары Виктор Пшибытко ҡабул итте. Экскурсиялар һәм методик эш бүлеге мөдире Людмила Комаровская делегаттарға 23 ҡатлы арҙаҡлы китапхананың төҙөлөүе тураһында һөйләне. Ул 2006 йылда асылған. Уның фондында 80 телдә 10 миллион дана китап һаҡлана. Марк Шагал, Сальвадор Дали, Пабло Пикассо кеүек бөйөк рәссамдарҙың автографтары һаҡлана. Хәҙер унда башҡорт классиктарының һәм заман яҙыусыларының китаптары ла бар. Башҡорт делегацияһының Минск ҡалаһына сәфәре алдынан Башҡортостандың әҙәби баҫмаларында белорус яҙыусылары әҫәрҙәре баҫылды. 11 октябрҙә, Республика көнөндә, Әҙәбиәтселәр йортонда үткәрелгән белорус һәм башҡорт шиғриәте кисе лә мөһим ваҡиғаға әйләнде. Беларусь яҙыусылары союзы етәксеһе Алесь Николаевич Карлюкевич сәләмләү һүҙе менән сығыш яһаны. Ойошмаға 700 әҙип ҡарай. Артабан сәхнәгә Башҡортостан Яҙыусылар союзы рәйесе, Башҡортостандың Дәүләт Йыйылышы – Ҡоролтай депутаты Айгиз Баймөхәмәтов күтәрелде. Ул Алесь Карлюкевич менән уның беренсе урынбаҫары Елена Стельмахҡа Башҡортостан Мәҙәниәт министрлығының Маҡтау грамоталарын тапшырҙы. “Беҙҙең өсөн ауыр ваҡытта Беларусь Рәсәйҙең союздашына әйләнде, - тине ул. – Һәм беҙ, мәҙәниәт вәкилдәре, әлбиттә, үҙ-ара бәйләнештәрҙе һаҡларға һәм нығытырға тейешбеҙ. Берҙәмлек менән көслөбөҙ! Белорус коллегаларыбыҙҙы Өфөлә ихлас көтәсәкбеҙ. Был 2023 йылдың майында Беларусь һәм Башҡортостан Яҙыусылар союздары араһында ҡул ҡуйылған килешеүгә ярашлы ҡаралған. Республика Башлығы Радий Фәрит улы Хәбиров һәм беҙҙең мәҙәниәт министры Әминә Ивний ҡыҙы Шафиҡова исеменән сәләмдәр еткерәм. Тап уларҙың булышлыҡ итеүе һөҙөмтәһендә Минск ҡалаһына яҙыусыларҙың сәфәре тормошҡа ашты”. “Күҙгә-күҙ ҡарап осрашыу берҙәмлекте нығытырға, әҙәбиәттең изгелеккә һәм рухилыҡҡа хеҙмәт итеүенә булышлыҡ итер”, - тине Елена Стельмах. Ул 2023 йылдың майында Башҡортостанда булғайны. Журналдарҙың баш мөхәррирҙәре Мөнир Ҡунафин, Юрий Горюхин, Гөлназ Ҡотоева, Лариса Абдуллина, Башҡортостандың Әҙәбиәт музейы директоры Миләүшә Ҡаһарманова, Башҡортостандың Кинематографистар союзы етәксеһе Зөһрә Бураҡаева, Башҡортостан Яҙыусылар союзының рус телле яҙыусылары берекмәһе етәксеһе Светлана Чураева, Башҡортостан Яҙыусылар союзы рәйесе урынбаҫары Тәнзилә Дәүләтбирҙина, “Ватандаш” журналының бүлек мөдире Зөлфиә Ханнанова сығыш яһаны. Башҡортостандың халыҡ артисткаһы Әлфиә Юлсурина башҡарыуында башҡорт, рус һәм белорус телдәрендә, урындағы артистарҙың йырҙары яңғыраны. Өфөнән делегацияға Айгиз Баймөхәмәтов етәкселек итте. “Планлаштырылғанды атҡарҙыҡ. Беларусь әҙәбиәте эшмәкәрҙәре – шағирҙар, прозаиктар, тәржемәселәр, баҫмалар мөхәррирҙәре - менән бәйләнештәр булдырылды. Был сәфәр һөҙөмтәһендә республикаларҙы тағы яҡынайтыр ныҡлы мәҙәни диалог булыр, тип ышанабыҙ. Әлеге ваҡытта Башҡортостандың Яҙыусылар союзы башҡорт телендә белорус антологияһын барлыҡҡа килтереү буйынса ҙур эш алып бара. Беларусь Республикаһының 40 заман яҙыусыһының 40 әҫәре башҡорт теленә тәржемә ителәсәк. Шул уҡ ваҡытта белорустар башҡорт әҙәбиәте антологияһын белорус теленә тәржемә итеүҙе әҙерләй. Киләһе йылда ике баҫманың презентацияһы планлаштырылған”.