Вуз-ара донъя кимәлендәге кампуста урынлашасаҡ ӨДНТУ-ның “Медиадизайн һәм креатив индустриялар” лабораторияһы дизайнда уникаль этностиль булдырыу өҫтөндә эшләй. Яңы майҙандарҙа республика продукцияһы өсөн туранан-тура брендинг, этник стилдәге предметтар һәм кейем коллекциялары әҙерләнәсәк. – Унда беҙҙең магистр төркөмө буласаҡ. Бик ҙур проекттар һәм фәнни программалар эшкәртеләсәк. Бынан тыш, һәр магистрҙың үҙ индивидуаль трекы бар, республика продукцияһын халыҡ-ара кимәлдә танытыу программаһынан алып йәмәғәт киңлеген рәсмиләштереүгә тиклем. Яңы заманса ҡорамалдар, шул иҫәптән ҙур форматлы баҫыу өсөн дә ҡуясаҡбыҙ. Проекттарҙың етдилиге айырым атмосфераны талап итә, ә вуз-ара кампуста ул бар, – тип пландары менән уртаҡлаша “Дизайн һәм сәнғәт ғилеме” кафедраһы мөдире Лидия Стратонова. Коллективтың ғилми һәм ижади тырышлығы һанлы мөхиттә Башҡортостандың заманса образын булдырыуға йүнәлтелгән. Улар – мөхит һәм предмет дизайны өлкәһендәге проекттар, прототип, макеттар эшләү, төрлө тәғәйенләнештәге продукттарҙы биҙәү һәм брендлаштырыу буйынса эштәр, электрон дәреслектәр дизайны, сайттарҙы биҙәү, моушен-дизайн, кейем һәм аксессуарҙар дизайны. Студенттарҙың һуңғы эштәренең береһе башҡорт халыҡ әкиәттәре темаһына комикстар эшләүгә арналды. Ҡайһы бер проекттар менән Башҡортостан нәшриәте ҡыҙыҡһына. “Урал батыр” эпосы буйынса комикстар сығарыу тураһында килешеү бар. Йәш дизайнерҙар һәм уларҙың остаздары 2023 йылда 74 проект әҙерләгән, уларҙың бер өлөшө университеттың ACADEMIA галереяһында күрһәтелә, ҡалғандары Өфө дәүләт нефть техник университетының төп корпусындағы экспозицияға әҙерләнә. «Медиадизайн һәм креатив индустрия» йүнәлеше буйынса белгестәрҙең тәүге сығарылышы 2024 йылда була. Сығарылыш уҡыусылары магистратураны вуз-ара кампуста тамамлаясаҡ. Хәтерегеҙгә төшөрәбеҙ, Өфөлә донъя кимәлендәге вуз-ара кампустың беренсе сиратын 2023 йылдың декабрендә тамамлау күҙаллана, икенсеһе 2025 йылдың аҙағына тиклем файҙаланыуға тапшырыла. Дөйөм майҙаны 146 мең квадрат метрҙан ашыу тәшкил иткән Кампус эшҡыуарлыҡты, фәнде һәм алдынғы белем биреүҙе йәлеп итеү һәм интеграциялау майҙансығы булырға тейеш. Төҙөлөш «Фән һәм университеттар» милли проекты сиктәрендә дәүләт-шәхси партнерлыҡ механизмдарын һәм концессия килешеүҙәрен ҡулланып, инновацион белем биреү мөхитен булдырыу буйынса федераль программа сиктәрендә ғәмәлгә ашырыла. Фото һәм сығанаҡ: https://pravitelstvorb.ru/news/21960/
