Ҡушымта һөҙөмтәле эшләү өсөн кәрәк

Башҡортостанда торлаҡ-коммуналь хужалыҡ мәсьәләләрен хәл итеү өсөн “Дәүләт хеҙмәттәре. Йорт” мобиль ҡушымтаһы – яңы электрон платформа сафҡа индерә. Был хаҡта Башҡортостан Хөкүмәте Премьер-министры Андрей Назаров етәкселегендәге кәңәшмәлә әйтелде. Унда муниципаль райондар һәм ҡалалар хакимиәттәре башлыҡтары ҡатнашты. Ҡушымтаның төп маҡсаты – күп күп фатирлы йорттарҙа йәшәүселәрҙең идарасы компаниялар менән һөҙөмтәле эшмәкәрлеген тәьмин итеү. Был платформа ярҙамында торлаҡ-коммуналь хеҙмәттәр өсөн түләргә, онлайн режимда милекселәрҙең дөйөм йорт йыйылыштарын үткәрергә мөмкин. - Быйыл Башҡортостанда мобиль ҡушымтаны файҙаланған 96 мең тирәһе кеше булырға тейеш. Системала күп фатирлы йорттарҙағы, кадастр һандарын теркәп, бер миллиондан ашыу кешене теркәргә кәрәк. Системаның барлыҡ мөһим мәғлүмәттәр менән тултырылыуы зарур. Был иҫәп приборҙарына, түләү документтарына, ойошмаларҙың банк реквизиттарына ла ҡағыла, - тине Премьер-министр. Башҡортостанда “Дәүләт хеҙмәттәре. Йорт” мобиль ҡушымтаһын таратыу буйынса юл картаһы раҫланған. Уны тормошҡа ашырыу тураһында республиканың торлаҡ-коммуналь хужалыҡ министры вазифаһын үтәүсе Юрий Палтусов хәбәр итте. Торлаҡ-коммуналь хужалыҡтың дәүләт мәғлүмәттәр системаһына мәғлүмәттәрҙе урынлаштырыу тураһында республиканың Торлаҡты һәм төҙөлөштө күҙәтеү буйынса дәүләт комитеты рәйесе Артур Дәүләтшин һөйләне. Андрей Назаров муниципаль райондар һәм ҡала округтары хакимиәттәре башлыҡтарына Торлаҡ-коммуналь хужалыҡтың дәүләт мәғлүмәттәр системаһына биналарҙың кадастр һандары, түләү документтары, иҫәпләү приборҙары һәм ойошмаларҙың банк реквизиттары тураһындағы мәғлүмәттәрҙең 90 процентын урынлаштырыуҙы тәьмин итергә ҡушты. Бынан тыш, системала күп фатирлы йорттарҙағы биналар һанынан мобиль ҡушымтаны файҙаланыусылар 10 проценттан да кәм булмаҫҡа тейеш. Премьер-министр барлыҡ муниципаль хеҙмәткәрҙәргә лә “Дәүләт хеҙмәттәре. Йорт” ҡушымтаһына эйә булырға кәрәклеге тураһында әйтте. Фото, сығанаҡ: pravitelstvorb.ru