Уҡытыусылыҡ стаждары мең йылдан ашыу!

Рәсәйҙә Уҡытыусы һәм остаз йылы сиктәрендә уҙғарылған был конкурстың Өфөлә үткән финалында илдең ике тиҫтә төбәгенән конкурсанттар ҡатнашты. Яҡут Республикаһынан Краснодар крайына тиклем географик киңлектәге ҡатнашыусыларҙы тупланы бәйге. Йәмғеһе 700-ҙән ашыу ғаилә-династияны йәлеп иткән конкурс М. Аҡмулла исемендәге Башҡорт дәүләт педагогия университетында үтте. “Быйыл конкурсҡа илебеҙҙең 78 төбәгенән 633 заявка килде. Беҙҙең өсөн ошо ғаиләләрҙең хеҙмәт һөҙөмтәһен, хеҙмәт данын бөтә Рәсәйгә таратыу мөһим. Был конкурс йәмғиәттә уҡытыусы һөнәренең абруйын күтәреүҙә тағы бер ҙур аҙым”, - тип билдәләне РФ мәғариф министры Сергей Кравцов. Ә Рәсәй Дәүләт Думаһы депутаты Эльвира Айытҡолова иһә үҙ сиратында уҡытыусы эше мәктәп стеналары менән генә сикләнмәүен әйтте. Уҡытыусылар ғаиләһендә, династияла балалар ата-әсәһенең хеҙмәтен күреп үҫә һәм күп осраҡта улар ошо уҡ юлды һайлай, тине депутат. Уның һүҙҙәренсә, был йәмғиәттә матур күренеш булып ҡала. “Дәүләт Думаһында бөгөн Уҡытыусы исемен, уның абруйын закон менән нығытыу тураһында фекерҙәр туплана, уҡытыусы һүҙе – закон булырға тейеш тигән хәҡиҡәтте күтәрергә кәрәк”, - тип белдерҙе депутат. БР мәғариф һәм фән министры вазифаһын башҡарыусы Илдар Мәүлетбирҙин да сарала үҙ династияһы тураһында һөйләп үтте. “Ниһайәт, уҡытыусы һөнәренең баһаһы арта башланы”, - тигән фекере менән дә бүлеште министр вазифаһын башҡарыусы. Әйтергә кәрәк, конкурс ҡыҙыу барҙы, сөнки Өфөгә илдең иң көслө, быуындан-быуынға педагогик тәжрибә туплаған, үҙ ерлегендә абруй ҡаҙанған уҡытыусылар килгәйне. Шулай ҙа конкурстың еңеүселәрен билдәләү, иң-иңдәрҙе һайлау йолаһы бар. Шулай итеп, конкурстың абсолют еңеүсеһе тип Псков өлкәһенән Любавин-Страшновтар династияһы танылды. Уларҙың дөйөм хеҙмәт стажы 565 йыл тәшкил итә. Әйткәндәй, бәйгелә был иң ҙур тәжрибә түгел ине. Мәҫәлән, Дағстандан килгән Сунгуровтар династияһы 1269 йыл дауамында йәш быуынға белем бирә! Башҡортостанда ла бихисап уҡытыусылар династиялары йәшәп-эшләп килә. Уларҙың ҡайһы берҙәре әлеге конкурста ҡатнашты. 105 йыллыҡ мөғәллимлек стажы булған Хисмәтуллин-Булатасовтар “Киләсәк нигеҙе” номинацияһында 2-се урын яуланы. Конкурс майҙаны булып торған университет ректоры Салауат Сәғитов бәйгелә уҡытыусылар ярышып ҡына ҡалмауын, ә үҙ-ара тәжрибә уртаҡлашыуын һәм педагогика өлкәһендә төбәктәр араһында дуҫлыҡ ептәре нығыныуын һыҙыҡ өҫтөнә алды. Ысынлап та, ярыш сәме лә мөһим, әммә ошондай берләштереүсе саралар бөгөнгө көндә бигерәк тә ҡиммәт. Фотолар: М. Аҡмулла исемендәге БДПУ.