"Баҡса - Республика көнөнә бүләк!"

Бөгөн Өфөлә Башҡортостан Башлығы Радий Хәбиров һәм Абхазия Президенты Аслан Бжания Сергей Аксаков исемендәге яңыртылған баҡсаны асыу тантанаһында ҡатнашты. Был йәмәғәт киңлеге 2023 йылдың апрелендә “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проекты сиктәрендә төҙөкләндерелә башланы. Аксаков исемендәге баҡса мәҙәни мираҫ ҡомартҡыларына ҡарай. Шуға күрә уның яңы ҡиәфәтен проектлағанда архитекторҙар был биләмәнең тарихи зоналарын һәм объекттарын һаҡлап ҡалған. Мәҫәлән, Пушкин урамы яғынан колоннадалы инеү урыны элементтарын һүтеп, реставрацияға ебәргәндәр. Уны тәүге төҫтәрҙә һәм фактурала тергеҙҙеләр. Ә Яңы Күпер урамы яғынан инеү өсөн яңы төркөм ҡалҡып сыҡты. Төҙөкләндереү концепцияһына ярашлы, баҡса бер нисә функциональ зонаға – тарихи аллеяға, йәйге амфитеатрға, әҙәби ҡунаҡхана, ваҡиғалар майҙансығына, балалар өсөн уйын комплексына, асыҡ китапханаға бүленгән. Бынан тыш, Аксаков исемендәге баҡсала инженер коммуникациялары яңыртылды, юлдар төҙөкләндерелде, бәләкәй архитектура формалары ҡуйылды, биләмә йәшелләндерелде. Шул уҡ ваҡытта ҡиммәтле ағастарҙы, шул иҫәптән 1834 йылдан үҫкән боронғо ҡарағасты һаҡлап алып ҡалғандар. Уны архитектура яҡтыртҡысы менән айырып ҡуйғандар. Төҙөүселәр шулай уҡ парктағы быуаны сүп-сарҙан һәм ылымыҡтарҙан таҙартҡан, һыу ятҡылығы ярын төҙөкләндергән. Башҡортостан Башлығы өфөләрҙе һәм ҡала ҡунаҡтарын яңыртылған баҡсаның асылыуы менән ҡотланы. – Был беҙҙең Республика көнөнә арналған бүләгебеҙ. Бында яҡташыбыҙ Сергей Тимофеевич Аксаковтың исеме менән бәйле бик матур йәмәғәт киңлеге булдырылды, – тине Радий Хәбиров. – Проектты төҙөүселәргә һәм ваҡытында бөтә эштәрҙе тамамлаған төҙөүселәргә рәхмәтемде белдерәм. Барлыҡ кешеләрҙе матур байрам менән ҡотлайым һәм һынауҙарҙы бергәләп үткәнебеҙ, тормошҡа ҡыуанғанығыҙ өсөн ысын күңелдән рәхмәт белдерәм. Йортоғоҙҙа яҡтылыҡ, йылылыҡ һәм изгелек булһын. Башҡортостан Башлығы һәм Абхазия Президенты Аксаков исемендәге баҡсаның тематик зоналарын ҡараны. Ә әҙәби ҡунаҡханала күренекле яҙыусының әҫәрҙәре күргәҙмәһе менән танышты һәм абруйлы ҡунаҡтар китабына яҙма ҡалдырҙы. Фото: Башҡортостан Башлығы сайты.