Башҡортостанда "Мәҙәниәт" милли проекты бик уңышлы тормошҡа ашырылып килә, был хаҡта күп яҙғаныбыҙ бар. Проекттың өс йүнәлеше бар - "Мәҙәни мөхит", "Ижади кешеләр" һәм "Һанлы мәҙәниәт". Өс йүнәлештә лә, республикабыҙ хөкүмәтенең эҙмә-эҙлекле эшмәкәрлеге арҡылы, дәррәү эш бара. "Мәҙәни мөхит", исеменән үк күренеүенсә, рухи тормошобоҙҙо байытҡан, ошо йүнәлештә эшләгән һәр төрлө учреждениеларҙың матди-техник базаһын нығытыуға, йәғни уларҙы йыһазландырыуға, мәҙәни эшмәкәрлек алып барылған биналарҙы яңыртыу, яңыларын төҙөү һәм башҡа шундай эштәрҙе атҡарып сығыуға йүнәлтелгән. Башҡортостанда был проект буйынса һис туҡтамай эш бара, әле бында, әле тегендә клубтар асыла, яңы ҡорамалдар, музыка ҡоралдары һатып алына. Әленән-әле ошо юҫыҡта ҡыуаныслы хәбәрҙәрҙе ишетеп-күреп торабыҙ. Республикабыҙҙың иң төпкөл райондарының береһе - Хәйбулла миҫалында проекттың нисек бойомға ашырылғанын асыҡ күреп була. Күптән түгел был төбәктәге Первомайский ауылында яңыртып эшләнгән клуб ҡайтанан эшмәкәрлеген тергеҙҙе. Ауылда 2000 йылда иҫке клуб урынына яңы бина төҙөлә, әммә ул бер-ике йыл ғына эшләп ҡала. Йылылыҡ селтәре менән тәьмин ителмәүе сәбәпле, ул артабан файҙаланыуға яраҡһыҙ тип табыла һәм клубтың эше туҡтай... Мәҙәни сараларҙы үткәреү ауыл мәктәбенең спорт залына күсә, ауыл халҡы ошонда йөрөй. Һәм, ниһайәт, 2022 йылда оҙаҡ йылдар көтөлгән хәбәр алына: "Мәҙәниәт" милли проекты буйынса иҫке клубты ремонтларға аҡса бүленгән! Тергеҙеү, йүнәтеү эштәре быйыл яҙҙа, апрель айында башлана. Үҙ ауылдарында тулы ҡанлы мәҙәни тормош гөрләһен, төрлө саралар бына тигән заманса бинала үтһен тип ҡанатланған ауыл халҡы ла ҡулынан килгән ярҙамды күрһәтә. Ә инде көҙөн, сентябрҙә, ялт итеп балҡып торған клуб бинаһын асыу тантанаһы үтә. – Был көтөлмәгән мөғжизәгә тиң булды. Бина ҙур, яҡты. Бөтә уңайлыҡтар булдырылған: санузел, йылы һыу, яңы йыһаз, балалар өсөн уйын бүлмәһе, яңы аппаратура, – тип ҡыуанысын йәшерә алмай клуб етәксеһе – мәҙәни ойоштороусы Дилә Ниғәмәтова. – Халыҡ мәҙәни сараларға теләп, ҡыуанып килә, дәррәү ҡатнаша. Ошо көндәргә тиклем, үҙ бинабыҙ булмаһа ла, төрлө түңәрәктәр һәм төркөмдәр эшләп килде: "Дуҫлыҡ" вокал ансамбле, өлкәндәр өсөн "Әхирәттәр" һәм балалар өсөн "Ҡояшҡай" бейеү түңәрәктәре, "Туғанлыҡ" инструменталь ансамбле, "Таналыҡ "фольклор түңәрәге. Бындай заманса бинабыҙ ҙа булғас, эшләргә дәрт тағы ла артты, иңдәргә ҡанат үҫте! Артабан да эшебеҙҙе әүҙем дауам итербеҙ, яңы түңәрәктәр, төркөмдәр ҙә асырбыҙ, тип өмөтләнәбеҙ, – ти Дилә Шәйхәйҙәр ҡыҙы. Бының шулай булырына шик юҡ, ана бит, фотоларға ҡараһаң, ниндәй заманса, өр-яңы итеп йыһазландырылған клуб! Ундай ерҙә яңынан-яңы матур идеялар тыуыр, илһам шишмәләре йырлап торор. Ә "Мәҙәниәт" милли проектын тормошҡа ашырыу барышында республикабыҙ етәкселеге, хөкүмәтенең эҙмә-эҙлекле эше, ҡуйылған маҡсаттарҙы ысын итеүгә төбәлгән ынтылыштары аша, бындай шатлыҡ республикабыҙҙың тағы күпме ауылына килер әле! Иншалла, шулай булһын. Рәүилә ҒАТАУЛЛИНА. Һүрәттәрҙә: заманса клуб һоҡландырырлыҡ; яңы клубҡа балалар ҙа, өлкәндәр ҙә берҙәй шат; яңы сәхнәләге тәүге сығыштар. Һулдан уңға: ауылдаштарын моңло тауышы менән ҡыуандырған Гөлдәр Хәбибуллина, гармунсы Иҙел Мәнишев, клуб етәксеһе Дилә Ниғәмәтова. Фотолар – Первомайский ауыл клубы архивынан.