«Башплодородие» яуаплылығы сикләнгән йәмғиәте «Хеҙмәт етештереүсәнлеге» милли проектының беренсе этабын тормошҡа ашырыу һөҙөмтәләрен йомғаҡланы. Предприятие ауыл хужалығы тауарҙарын етештереүселәрҙе химик матдәләр — минераль ашламалар һәм үҫемлектәрҙе ауырыуҙарҙан һәм ҡоротҡостарҙан һаҡлау продукцияһы менән тәьмин итә, шулай уҡ агрохимик эштәр башҡара. Мәҫәлән, сәсеүлектәрҙе химик эшкәртеү, шыйыҡ минераль ашламалар һибеү менән шөғөлләнә. Башҡортостан Республикаһының Төбәк компетенция үҙәге белгестәре предприятие келәттәренән ашламаларҙы ебәреү процесын оптималләштереүгә булышлыҡ иткән. Һаҡсыл етештереү ҡоралдарын индереү һөҙөмтәһендә пилот участкаһының бер хеҙмәткәренә етештереү күләме 20 процентҡа - 10 тоннанан 12 тоннаға тиклем артҡан. Был эште 95 сәғәттән 80 сәғәткә тиклем, йәғни 15 процентҡа тиҙләтә. — Команда эше — уртаҡ маҡсатҡа өлгәшеү өсөн берлектәге тырышлыҡ. Хәҙерге шарттарҙа предприятиеның бурысы — шул уҡ эшселәр менән етештереү күләмен арттырыу. Һаҡсыл етештереү һәр хеҙмәткәрҙең эшен оптималләштереүҙе күҙ уңында тота. «Хеҙмәт етештереүсәнлеге» милли проекты предприятиеларға ошо процестарҙы яйға һалырға ярҙам итеү маҡсатында эшләнә. Башҡортостандан проектта 161 компания ҡатнашты, — тине Башҡортостандың иҡтисади үҫеш һәм инвестиция сәйәсәте министрының беренсе урынбаҫары Айрат Фәхретдинов. «Башплодородие» яуаплылығы сикләнгән йәмғиәтендә проектҡа келәт бүлеге, транспорт объекттары, бухгалтер иҫәбе инде. Был тармаҡтарҙа 25-ләп проблема асыҡланған. Транспорт тармағында инеү юлдарының тарлығы, тейәү өсөн сираттың оҙайлығы, тейәү-бушатыу планының булмауы эште тотҡарлауға сәбәптәр булараҡ билдәләнгән. Компания хеҙмәткәрҙәре төрлө программаларға өйрәтелгән. Алынған белем үрҙә телгә алынған мәсьәләләрҙе хәл итергә ярҙам иткән. «Башплодородие» яуаплылығы сикләнгән йәмғиәте директоры Эльмир Асаев әйтеүенсә, проектта ҡатнашыу эш процестарын икенсе яҡтан ҡарарға мөмкинлек биргән. – Проект маҡсаттарына өлгәшеүҙән тыш, киләсәктә файҙалы буласаҡ яңы белем һәм оҫталыҡ алдыҡ, тәжрибә тупланыҡ. Ҡатмарлы ашламаларҙы һаҡлау һәм таратыу процесын оптималләштергәндә алған тәжрибәне ҡабатларға ниәтләйбеҙ. Был проектта ҡатнашыу мөмкинлеге өсөн рәхмәт, — тип уртаҡлашты Эльмир Асаев. Белешмә: “Хеҙмәт етештереүсәнлеге” милли проекты (национальный проект "Поизводительность труда") Рәсәй Федерацияһы Президенты Владимир Путиндың май указына ярашлы раҫланған һәм 2024 йылға илдә хеҙмәт етештереүсәнлеген йыл һайын 5 процентҡа арттырыу өсөн шарттар тыуҙырыуға йүнәлтелгән. Фото Башҡортостан Хөкүмәте сайтынан алынды.