Найти в Дзене
Башҡортостан гәзите

Юлдарҙа һаҡ булығыҙ!

Бөрө районында ЮХХДИ хеҙмәткәрҙәре үлемесле аварияның сәбәбен асыҡлай. Өфө – Яңауыл юлында КамАЗ менән идара иткән 27 йәшлек ир Калинники ауылы яғынан оло юлға сығып килгән “Ниссан” машинаһы менән бәрелешә. Авария һөҙөмтәһендә сит ил машинаһының водителе һәм пассажиры дауаханаға оҙатыла, артта ултырған 54 йәшлек ҡатын ваҡиға урынында йән бирә. ЮХХДИ хеҙмәткәрҙәре һәм башҡа вәкәләтле органдар әлеге мәлдә ваҡиға урынында эшләй. Авария һөҙөмтәләре асыҡлана. Баҡалы районында Баҡалы – Иҫке Шәрәшле юлында 35 йәшлек ир “Ока” автомобиле менән идара иткән мәлдә велосипедта китеп барған 84 йәшлек оло кешене бәрҙерә. Авария һөҙөмтәһендә 84 йәшлек олатай “ашығыс ярҙам” машинаһында йән бирә. Әлеге мәлдә ваҡиға сәбәптәре асыҡлана. Башҡортостандың ЮХХДИ идаралығы етәксеһе Владимир Севастьянов ошо көндәрҙә һауа торошоноң ҡырҡа үҙгәреүе тураһында хәбәр итә һәм юлдарҙа һаҡ булырға саҡыра. Ул ямғыр яуғанда тиҙлекте кәметергә, ҡаршы һыҙатҡа сыҡмаҫҡа, дистанцияны тоторға саҡыра. Фотолар ЮХХДИ идаралығынан алынды.