10 октябрҙә Өфөлә Башҡортостан Башлығы Радий Хәбиров Рәсәй Хөкүмәте Рәйесе урынбаҫары Александр Новак менән осрашты. Көн тәртибендә – республиканың сәнәғәт һәм энергетика инфраструктураһын үҫтереү мәсьәләләре. Төбәк етәксеһе вице-премьерға Белоруссияның “АМКОДОР” холдингы иген киптереү комплекстары етештереү буйынса завод асыуҙа, шулай уҡ төҙөлөш һәм коммуналь техника сығарыу буйынса яңы предприятие төҙөлөшөн сафҡа индереүҙә ҡатнашҡаны өсөн рәхмәт әйтте. – Белоруссия партнерҙары менән берлектә яңы майҙансыҡта ҙур трактор заводын төҙөргә ниәтләйбеҙ, – тип дауам итте Радий Хәбиров. – Етештереү майҙаны 40 мең квадрат метр тәшкил итәсәк. Александр Новак, ауыл хужалығы өсөн машиналар эшләү техникаһын етештереү буйынса предприятие асыу – Башҡортостан өсөн мөһим ваҡиға, тип билдәләне. – Был Союз дәүләтен үҫтереү һәм Белоруссия партнерҙары менән интеграция сиктәрендәге төп проекттарҙың береһе, – тине Рәсәй Хөкүмәте Рәйесе урынбаҫары. – Яңы инвестициялар һәм технологик суверенитетты нығытыуға өлөш. Буласаҡ заводтың продукцияһы Башҡортостанда һәм илдең башҡа төбәктәрендә лә талап ителер, тип ышанам. Радий Хәбиров Рәсәй Хөкүмәтенә Урал аръяғының энергия системаһын модернизациялауға ярҙам иткәне өсөн дә рәхмәт белдерҙе. Александр Новак, дөйөм алғанда, төбәк энергетикаһы ышаныслы эшләй, тип һыҙыҡ өҫтөнә алды. – Башҡортостанда электр энергияһын ҡулланыу былтыр дүрт процентҡа артты. Ыңғай динамиканы иҫәпкә алып, иҡтисадта был тенденция һаҡлана, – тине вице-премьер. – Һис шикһеҙ, Хөкүмәт селтәр комплексын үҫтереү йәһәтенән республикаға ярҙам итәсәк, сөнки был яңы предприятиелар төҙөүгә булышлыҡ итә. Александр Новак Радий Хәбировҡа Рәсәй Президенты Владимир Путин башланғысы менән үтәлгән социаль газ үткәреү программаһын һөҙөмтәле тормошҡа ашырғаны өсөн рәхмәт белдерҙе. – Башҡортостанда программа эшләгән осорҙа 40 меңдән ашыу яңы ҡулланыусы газға тоташтырылды, – тине вице-премьер. - Ҡорамалдар һатып алыуға һәм инженер инфраструктураһы төҙөүгә сығымдарҙы финанслау буйынса республикала халыҡтың мохтаж категорияларына ярҙам итеү мөһим. Төбәктә газ үткәреү кимәле – бик юғары. Фото: Башҡортостан Башлығы сайты.