Был мәсьәләне хәл итеү берҙәм көс талап итә

III Халыҡ-ара финанс хәүефһеҙлеге буйынса олимпиада тамамланды. Быйыл сарала 19 илдән 500-ҙән ашыу кеше ҡатнашты. Рәсәй Президенты Владимир Путин ярҙамында үткәрелгән олимпиада шәхси йәки дәүләт аҡсаһын һаҡлауҙың заман ысулдары тураһындағы белемде популярлаштырыуға йүнәлтелгән. Үткән йылдарҙағы кеүек, олимпиаданың финалы “Сириус” федераль биләмәһендә үткәрелде. 2 – 6 октябрҙә финалда ҡатнашыусылар олимпиада мәсьәләләрен генә сисеп ҡалманы, 60-тан ашыу мәғариф, спорт һәм мәҙәни саранан торған бай программала ла ҡатнашты. “Тиңдәрсә һөйләшеү” пленар сессияһында сарала ҡатнашыусылар менән Рәсәй Президенты Владимир Путин да аралашты. Ул олимпиаданы үткәреүҙең мөһимлеге тураһында белдерҙе. “Һиҙгер өлкәлә халыҡ-ара аралашыуҙың, мәғариф өлкәһендә хеҙмәттәшлек итеүҙең, дуҫлыҡ, партнерлыҡ бәйләнештәрен булдырыуҙың бындай практикаһы, һис һүҙһеҙ, мөһим – бигерәк тә әлеге, йылдан-йыл финанс хәүефһеҙлеген тәьмин итеү көнүҙәк, ҡатмарлы һәм комплекслы була барған ваҡытта, һис арттырыуһыҙ, масштаблы мәсьәлә була бара. Ә уны хәл итеү берҙәм көстө һәм төрлө өлкәләрҙә белгестәрҙе әҙерләүҙең юғары кимәлен талап итә”, - тип белдерҙе. Рәсәй Хөкүмәте Рәйесе урынбаҫары Дмитрий Чернышенко финанс хәүефһеҙлеге буйынса өсөнсө олимпиадаға һығымталар яһаны: “Быйыл сарала ҡатнашыусы илдәр географияһы 19-ға тиклем артты. Был БДБ илдәре генә түгел, алыҫ сит илдәр ҙә. Олимпиада даирәһе киңәйә һәм беҙ уны дауам итеү, киңәйтеү өсөн ихтыяжды күрәбеҙ. Бөгөн 486 кеше финалға сыҡты. Был, былтырғы менән сағыштырғанда, күберәк. Рәсәйҙән – 109 уҡыусы һәм 215 студент, сит илдәрҙән – 162, БДБ илдәренән – 69, алыҫ сит илдәрҙән 93 студент ҡатнашты. Рәсәйҙән 24 уҡыусы һәм 105 студент (Рәсәйҙән – 71) еңеүсе булды, призлы урын яуланы. Шуныһы мөһим: еңеүселәр Рәсәйҙең алдынғы вуздарына уҡырға инеү мөмкинлегенә эйә. Һөҙөмтәлә олимпиада ҡыҙҙарға һәм егеттәргә тормошҡа юллама бирә”. Рәсәйҙәге ҙур компанияларҙың финанс хәүефһеҙлеге буйынса белгестәре конференциялар, әңгәмәләр һәм осрашыуҙар үткәрҙе. Беренсе тапҡыр олимпиадала “Берҙәмлек” интернет-платформаһы менән таныштырҙылар. Ул Рәсәй Президенты ҡушыуы буйынса эшләнгән. Һанлы ресурс олимпиадала ҡатнашырға теләгән уҡыусылар һәм студенттар өсөн мәсьәләләрҙән тора. Тағы финанс хәүефһеҙлеге өлкәһендәге оҫталарға квалификацияһын күтәреү, тәжрибә уртаҡлашыу мөмкинлеген бирә. Ошо уҡ көндәрҙә олимпиада барышында “Сириус-2023” финанс хәүефһеҙлеге буйынса халыҡ-ара форумы булды. Унда ҡатнашыусылар киберенәйәтселектең яңы саҡырыуҙарына ҡаршы берҙәм көрөш хаҡында аралашты.