Туристар өсөн шарттар яҡшыра

2023-2024 йылдарҙа туристик инфраструктураны үҫтереү өсөн Башҡортостан федераль грант ярҙамының рекордлы күләмен – 1,5 миллиард һум самаһын йәлеп итә. Был күрһәткес буйынса республика - Рәсәй төбәктәре араһында лидер. Башҡортостандың эшҡыуарлыҡ һәм туризм министры Рөстәм Афзалов аҙналыҡ оператив кәңәшмә барышында ошо хаҡта һөйләне. 2023 йылдың һигеҙ айында Башҡортостанға туристар ағымы уҙған йылдың ошо уҡ осоро менән сағыштырғанда 31,2 процентҡа артҡан һәм 1,7 миллион сәфәр тәшкил иткән. Был Волга буйы федераль округында – икенсе, илдә 12-се урын. Рөстәм Афзалов әйтеүенсә, туристарҙы йәлеп иткән республиканың уникаль тәбиғәт үҙенсәлектәре менән бер рәттән министрлыҡ тейешле инфраструктура булдырыу өҫтөндә лә эш алып бара. Федераль гранттар өс йүнәлеш буйынса бүленә. Мәҫәлән, модулле капиталь булмаған урынлаштырыу сараларын булдырыуға 930,6 миллион һум бүлгәндәр. Ошо суммаға 25 муниципаль берәмектә 58 инвестиция проектын тормошҡа ашырыу күҙаллана. Киләһе йүнәлеш – “Туризм һәм ҡунаҡсыллыҡ индустрияһы” милли проекты сиктәрендә туристик инфраструктура булдырыуға һәм уны үҫтереүгә конкурстар еңеүселәренә ярҙам итеү. – 2023 йылдың июненән авгусына тиклем өс конкурс үткәрҙек һәм бизнес яғынан берлектә финанслау шарттарында 92 инвестиция проектын хупланыҡ, – тип хәбәр итте Рөстәм Афзалов. – Дөйөм күләме 335,6 миллион һумлыҡ федераль субсидия еңеүселәргә йүнәлтелгән дә инде. Һүҙ 25 кемпинг булдырыу, 23 пляжды төҙөкләндереү, 24 туристик локациялар өсөн ҡорамалдар һатып алыу, электрон белешмәләр булдырыу, яңы туристик маршруттар әҙерләү, сәләмәтлек мөмкинлектәре сикләнгән кешеләр өсөн проекттарҙы тормошҡа ашырыу хаҡында бара. –- Ошо ике дәүләт ярҙамы төрө буйынса республиканың 36 муниципалитетында йәмғеһе 150 инвестиция проекты тормошҡа ашырыла, уларҙың 2,29 миллиард һумы – инвесторҙар аҡсаһы, – тине министр. – Еңеүсе проекттарҙың күбеһе Өфө биләмәһендә, шулай уҡ Нуриман, Белорет, Бөрйән, Баймаҡ, Ишембай, Әбйәлил, Ғафури, Ҡариҙел райондарында. Өсөнсө йүнәлеш – Өфөнөң туристик үҙәген төҙөкләндереү. Был маҡсатҡа федераль бюджеттан 208,8 миллион һум йүнәлтелгән. Радий Хәбиров республиканың Эшҡыуарлыҡ һәм туризм министрлығына федераль гранттар йәлеп итеү өлкәһендә һөҙөмтәле эшләгәндәре өсөн рәхмәт белдерҙе. Төбәк етәксеһе “Янғантау” геопаркында “Салауат ере” тарихи-мемориаль комплексына юлды төҙөкләндереү, шулай уҡ Торатау тирәләй ҡулса һуҡмағын төҙөү һәм “Шихан итәгендә” этнокомплексын төҙөкләндереү мәсьәләләрен контролдә тоторға ҡушты. Фото: Башҡортостан Башлығы сайты.