Бөгөн төбәк Башлығы Радий Хәбиров Рәсәйҙең һәм Башҡортостандың дәүләт наградаларын тапшырҙы. Төбәк иҡтисадының төрлө тармаҡтарында, предприятиеларҙа, ойошма һәм учреждениеларҙа эшләгән 61 кешенең һөнәри ҡаҙаныштары ордендар, миҙалдар, маҡтаулы исемдәр, почет грамоталары һәм рәхмәт хаттары менән билдәләнде. Төбәк етәксеһе шулай уҡ 2023 йылда Башҡортостандың фән һәм техника өлкәһендәге дәүләт премияһы лауреаттарына, “Башҡортостандың хеҙмәт династиялары” республика конкурсы еңеүселәренә һәм призерҙарына дипломдар тапшырҙы. – Бөгөн төп байрамыбыҙ – Республика көнө алдынан беҙ оло ихтирам менән юғары дәүләт наградаларын тапшырабыҙ. Был залда төрлө һөнәр эйәләре: ғалимдар, табиптар, уйлап табыусылар, энергетиктар, төҙөүселәр, мәҙәниәт эшмәкәрҙәре, уҡытыусылар, юристар, күренекле идарасылар йыйылған. Һеҙҙең хеҙмәтегеҙ һөҙөмтәһендә Башҡортостан уңышлы үҫешә, иҡтисадты һәм социаль өлкәне нығыта. Ышаныс менән алға ҡарай, – тине ул. – Беҙ сәнәғәтселәребеҙҙең һәм аграрийҙарҙың юғары һөҙөмтәләренә ҡыуанабыҙ. Кешеләргә оҙаҡ йылдар хеҙмәт итәсәк күләмле инфраструктура проекттарын тормошҡа ашырабыҙ. Рекордлы торлаҡ, мәктәп, балалар баҡсаһы, дауахана һәм спорт үҙәктәре төҙөйбөҙ. Ҡалаларҙы һәм ауылдарҙы төҙөкләндерәбеҙ. Кешеләр етеш йәшәһен һәм балалар үҫһен өсөн, бөтә көсөбөҙҙө һалабыҙ. Радий Фәрит улы әйтеүенсә, республиканың уңышында ошонда ултырған һәр кешенең хеҙмәте, тәжрибәһе, һәләттәре, үҙенсәлекле компетенциялары ята. “Һәр берегеҙ – республиканың ғорурлығы. Йәш быуын һеҙгә тиңләшә”, – тине ул. Республика етәксеһе бүләкләнгән ҡайһы бер кешеләрҙә айырым туҡталды. – Беҙ Рәсәй Фәндәр академияһы Өфө федераль тикшеренеү үҙәгенең Тарих, тел һәм әҙәбиәт институты авторҙары коллективына “Башҡорт теленең машина фонды” мәғлүмәт системаһы” эше өсөн республиканың фән һәм техника өлкәһендәге дәүләт премияһын тапшырабыҙ. Улар – Зиннур Сиражетдинов, Лилиә Боҫҡонбаева, Анита Ишмөхәмәтова, Гөлгөнә Шәмсетдинова. Был эшләнмә рус теленең машина фондынан һуң илдәге лингвистика буйынса икенсе эш. Авторҙар башҡорт әҙәби теле һәм уның диалекттары буйынса ғәйәт ҙур материал йыйҙы, – тине Радий Фәрит улы. Пирогов ордены менән Башҡорт дәүләт медицина университетының хирургия ауырыуҙары кафедраһы профессоры Радик Рәдиф улы Фаязов наградланды. Талантлы хирург һәм уҡытыусы, ул хәрби-ялан шарттарында тәүге медицина һәм хирургия ярҙамы күрһәтеү буйынса ординаторҙар әҙерләү программаһын әҙерләгән. “Рәсәй Федерацияһының атҡаҙанған физик культура хеҙмәткәре” тигән маҡтаулы исемгә Стәрлетамаҡтың олимпия резервындағы спорт мәктәбе тренеры Юрий Владимирович Зубков лайыҡ булды. Тиҫтәләгән уҡыусылары араһында – бик күп абруйлы ярышта еңеүселәр һәм призерҙар. Танылған яҙыусы, Башҡортостандың халыҡ шағиры Гөлфиә Аҙнағол ҡыҙы Иҙелбаева тиҫтәләгән нәфис китаптар сығарған, уларҙың бер өлөшө Мәскәүҙә, Татарстанда һәм хатта илдән ситтә донъя күргән. Уның әҫәрҙәре донъяның 25 теленә тәржемә ителгән. Шиғырҙарына 500-ҙән ашыу лирик һәм балалар йыры яҙылған, һигеҙ аудио- һәм видеойыйғыстар сығарылған. Ринат Зөфәр улы Харисов хаҡлы рәүештә милли биҙәктәр менән картиналар эшләү оҫтаһы булып һанала. Уның сюжеттары йылылыҡ һәм ихласлыҡ менән айырылып тора, ауыл тормошон, халыҡ йолаларын һәм ғөрөф-ғәҙәттәрен сағылдыра. – Һәр берегеҙ тураһында бик күп йылы һүҙҙәр әйтергә була. Күп йыллыҡ намыҫлы хеҙмәтегеҙ өсөн рәхмәт. Һеҙҙе лайыҡлы наградаларығыҙ менән ҡотлайым. Һеҙҙең менән ғорурланабыҙ. Ныҡлы һаулыҡ, тыныслыҡ, именлек, яңы уңыштар теләйем, – тине ул. Фотолар: Башҡортостан Башлығы сайты.