Һуңғы биш йылда Башҡортостанда коммуналь техниканың 34 проценты яңыртылған, был - төрлө тәғәйенләнештәге 710 машина. Республиканың торлаҡ-коммуналь хужалыҡ министры вазифаһын башҡарыусы Юрий Палтусов Радий Хәбиров үткәргән аҙналыҡ оператив кәңәшмәлә ошондай мәғлүмәттәр килтерҙе. Торлаҡ-коммуналь хужалыҡ предприятиеларында йәмғеһе 2,1 млн берәмек коммуналь техника иҫәпләнә. 2019-2022 йылдарҙа паркты яңыртыуға төбәк бюджетынан 2,3 миллиард һум аҡса йүнәлтелгән. Был аҡсаға тракторҙар, мини-тейәгестәр, автогрейдерҙар, үҙбушатҡыстар, ҡатнаш юл машиналары һатып алынды. – 2023 йылда беҙ лизинг килешеүҙәре буйынса яңы техника һатып алыу механизмын әҙерләнек, – тип хәбәр итте Юрий Палтусов. – Республика бюджетынан 208 коммуналь машина һатып алыуға быйыл 155 миллион һум аҡса бүленәсәк. Ҡалған 2 миллиард һум 2028 йылға тиклем түләнергә тейеш. Был ҡыҫҡа ваҡыт эсендә яңы техника алырға мөмкинлек бирәсәк. Мәҫәлән, 34 үҙбушатҡыс, 12 фронталь тейәгес һәм Белоруссияла етештерелгән 15 трактор коммуналь хеҙмәттәргә 11 октябрҙә үк тапшырыла. Бынан тыш, республика муниципалитеттары техник паркты үҙ аҡсалары иҫәбенә лә яңырта. Шулай, быйыл коммуналь хеҙмәттәргә өҫтәмә рәүештә 38 машина ҡайтарыласаҡ. Юрий Палтусов шулай уҡ, һауа шарттарын иҫәпкә алып, бөтә муниципалитеттар ҙа йылытыу миҙгелен башлау тураһында ҡарар ҡабул итте, тип хәбәр итте. 9 октябргә 4 мең социаль объектҡа һәм 7,8 мең күп фатирлы йортҡа йылы бирелгән. Был эште 12 октябргә тиклем тамамларға ниәтләйҙәр. – Йылытыу системаларын эшкә ҡуша башлайбыҙ. 12 октябрҙә бөтә объекттарҙың һәм йорттарҙың йылыға тоташтырылыуы тураһында доклад биреүегеҙҙе һорайым, – тине Радий Хәбиров. Фото: Башҡортостан Башлығы сайты.