Башҡортостандың баш ҡалаһында Транспорт министрлығы ҡарамағындағы Йәмәғәтселек советы ағзалары Шафиев урамындағы участканың ремонт сифатын тикшерҙе. Төҙөкләндереү саралары “Хәүефһеҙ сифатлы юлдар” милли проекты (национальный проект «Безопасные качественные дороги») сиктәрендә башҡарылды. Был турала Башҡортостандың Транспорт һәм юл хужалығы министрлығының матбуғат хеҙмәте хәбәр итә. Милли проект буйынса Парк урамынан башлап Шафиев урамындағы 14-се торлаҡ йорт ихатаһына боролошҡа тиклем юл ремонтланған. Ярты километрында фрезер япмаһы эшләнгән, борт таштары ҡуйылған, тротуар ремонтланған һәм башҡа эштәр башҡарылған. Йәмәғәтселәр ремонт сифатын “бишле” гә баһаланы. -Был юл Башҡортостан дәүләт медицина университеты клиникаһына һәм 40-сы мәктәпкә илтә. Бында йәмәғәт транспорты туҡталыштары ла бар. Тротуарҙар, шулай уҡ паркка инеү юлы ла төҙөкләндерелгән, - тип билдәләне Транспорт министрлығы ҡарамағындағы Йәмәғәтселек советы рәйесе Рөстәм Баязитов. Ләкин йәмәғәтселәр етешһеҙлекте лә таптылар. Мәктәп эргәһендә йәйәүлеләр үткәүеле алдынан яһалма тигеҙһеҙлектә разметка булмауына иғтибар иттеләр. Подрядсылар юлдың был участкаһында тиҙҙән разметка эшләргә һүҙ бирҙе. Шуны билдәләү мөһим, “Хәүефһеҙ сифатлы юлдар” милли проекты сиктәрендә Өфөлә 2023 йылда оҙонлоғо алты километрҙан ашыу алты юл объекттарының торошон яҡшыртыу ниәтләнә. Өфөнөң Лев Толстой, Рига, Демъян Бедный, Шафиев, Менделеев һәм башҡа урамдарында эштәр алып барылды. Биш объектта улар тамамланды. Был саралар Рәсәй Президенты Владимир Путиндың май указдарын тормошҡа ашырырға булышлыҡ итә. Фото: “Республика Башкортостан” гәзитенән.