Стәрлетамаҡ ҡалаһына эш сәфәре менән Башҡортостан Республикаһы Хөкүмәте Премьер-министры Андрей Назаров килде. Башта ул капиталь ремонттан һуң яңы уҡыу йылында үҙ ишектәрен асҡан 30-сы мәктәпте ҡараны. Был уҡыу йорто - ҡаланың иң ҙур белем биреү учреждениеларының береһе, унда 1600 уҡыусы белем ала. Реконструкция «Мәктәп мәғариф системаларын модернизациялау» федераль программаһын тормошҡа ашырыу сиктәрендә үткәрелгән. Бинаны ремонтлауға һәм йыһазландырыуға федераль һәм төбәк бюджеттарынан 117 миллион һум аҡса бүленгән. Республика бюджетынан айырым территорияны төҙөкләндереүгә 3,89 миллион һум йүнәлтелгән. Капиталь ремонттан һуң мәктәптә барыһы ла уҡыу процесы уңайлы һәм ҡыҙыҡлы үтһен өсөн йыһазландырылған. Туҡланыу ойоштороуға айырыуса иғтибар бүленгән. “Балалар сифатлы һәм яңы аҙыҡ-түлектән әҙерләнгән тәмле иртәнге һәм төшкө аш алырға тейеш. Дөрөҫ һәм баланслы туҡланыу үҫеп килгән организм өсөн бик мөһим”, - тине Андрей Назаров. Ул республиканың Мәғариф һәм фән министрлығына мәктәп ашханаһына пар конвектоматы һатып алыу мәсьәләһен эшләргә ҡушты. Төбәктәрҙең бөтә мәктәптәре буйынса дөйөм анализ яһарға һәм кәрәк булғанда ошо ҡорамалдарҙы һатып алырға кәрәклегенә баҫым яһаны. Шулай уҡ Стәрлетамаҡ хакимиәтендәге етәкселәргә мәктәп ашханаһына көтмәгәндә килеп төшкө аш ашарға кәңәш итте. Был ҡулды пульста тотоп торорға һәм һәр ваҡыт был мөһим өлкәләге хәлдәрҙе белергә мөмкинлек бирәсәк. Артабан Премьер-министр ҡаланың социаль-иҡтисади үҫеше мәсьәләләре буйынса кәңәшмә үткәрҙе. Хөкүмәт Рәйесе билдәләүенсә, Стәрлетамаҡ ҡалаһы эҙмә-эҙлекле үҫешә һәм абсолют күрһәткестәр буйынса республиканың иң яҡшы ун муниципалитеты иҫәбенә инә. - 8 ай эсендә үҙебеҙҙә етештерелгән тауарҙар күләме 16 процентҡа артҡан. Ҡала округында сафҡа индерелгән торлаҡ һаны буйынса республикала дүртенсе һәм инвестициялар күләме буйынса етенсе урында - 36 миллиард һумға яҡын суммаға 110-ға яҡын инвестиция проекты тормошҡа ашырыла. Йыл башынан уртаса айлыҡ эш хаҡы 13,4 процентҡа күтәрелгән һәм уртаса 52 мең һум самаһы тәшкил итә. Теркәлгән эшһеҙлек кимәле ике тапҡырға кәмегән. Шул уҡ ваҡытта Стәрлетамаҡта ыңғай миграция күренеше теркәлә. Был мөһим күрһәткес, бөтә муниципалитеттарҙа ла ул яҡшы түгел, — тип һыҙыҡ өҫтөнә алды Премьер-министр. Стәрлетамаҡ ҡалаһы башлығы Рөстәм Ғәзизов һүҙҙәренсә, былтыр муниципалитетта етештереү күләме былтырғыға ҡарағанда артҡан. “Авангард” федераль ҡаҙна предприятиеһы, “Ҡыҙыл Пролетарий” акционер йәмғиәте һәм “Станок төҙөлөшө” фәнни-етештереү берекмәһе былтырғы кимәлгә ҡарата 157 проценттан 386 процентҡа тиклем иң ҙур һөҙөмтәләр күрһәтә. Күп предприятиелар импортты алмаштырыуға йүнәлтелә һәм эшләй. Стәрлетамаҡты үҫтереү менән бәйле мәсьәләләр республика Хөкүмәтендәге оператив һәм эш кәңәшмәләрендә даими ҡарала. Шулай итеп, әлеге ваҡытта 40-ҡа яҡын йөкләмәне үтәү контролдә тотола. - Ике йыл элек бында Хөкүмәттең киңәйтелгән күсмә ултырышын үткәрҙек. Экологик именлек, төҙөкләндереү, транспорт һәм юл хужалығын үҫтереү менән бәйле көнүҙәк мәсьәләләр ентекле ҡаралды. Ул ваҡытта бирелгән йөкләмәләрҙең күпселеге үтәлә. Шул иҫәптән өс атмосфера һауаһын контролдә тотоу станцияһы сафҡа индерелә, Стәрле йылғаһының яр буйын төҙөкләндереү тамамлана, 1-се балалар музыка мәктәбе реконструкциялана. Троллейбус паркын киңәйтеү һәм Ағиҙел йылғаһы аша күперҙе ремонтлау мәсьәләләре асыҡ ҡала, бында беҙгә уларҙың хәл ителешен бергәләп ентекле тикшерергә кәрәк, — тине Министрҙар кабинеты етәксеһе. Кәңәшмә йомғаҡтары буйынса Хөкүмәт Премьер-министры республика ведомстволарына һәм ҡала хакимиәтенә бер нисә йөкләмә бирҙе, уларҙың иң мөһиме – 2026 йылға тиклем Стәрлетамаҡ ҡалаһының инфраструктураһын үҫтереү буйынса саралар планын әҙерләү. Шулай уҡ Андрей Назаров милли проекттар һәм федераль программалар объекттары һәм саралары буйынса федераль бюджет средстволарын үҙләштерергә ҡушты. Бындай проекттар иҫәбендә Милли именлек фонды сығымдарын йәлеп итеп, Көнбайыш биҫтәһен һыу менән тәьмин итеү һәм һыуҙы ағыҙыу селтәрҙәрен модернизациялау. Уның хаҡы 1 миллиард һумдан ашыу тәшкил итә. Республиканың Эшҡыуарлыҡ һәм туризм министрлығына Стәрлетамаҡҡа туристарҙы йәлеп итеүҙә ярҙам күрһәтергә ҡушылды. - Ҡала округының киләсәге ҙур, тип ышанам. Ул үҙенең сауҙагәрлек традициялары, ҡабатланмаҫ атмосфераһы менән дан тота. Был өлкәгә туристарҙы һәм инвесторҙарҙы йәлеп итергә кәрәк. Был республиканың ҙурлығы буйынса икенсе ҡала ғына түгел, ә Башҡортостандың сәскә атыуына таяныс. Һәм беҙ уны үҫтереү өҫтөндә эшләргә әҙербеҙ, - тине Хөкүмәт Рәйесе, осрашыуҙы тамамлап. https://vk.com/video555400080_456239305?list=47e9b6cdc6fd734ef8 https://pravitelstvorb.ru/news/21913/