Башҡортостан Республикаһының атҡаҙанған сәнғәт эшмәкәре Рафаил Ғәбделхәй улы башҡорт музыкаһында симфония жанрына нигеҙ һала. Хәрби ғаиләһендә тыуып үҫкән егет башта ил буйынса төрлө музыка мәктәптәрендә уҡый, әммә төп юғары белемде пианист һәм композитор булараҡ Өфөлә ала. Бында уның остазы, профессор Заһир Исмәғилев була. Тап Заһир Ғарип улы уға башҡорт музыкаһына мөхәббәт уята ла инде. Уҡыуҙан һуң Рафаил Ғәбделхәй улы туғыҙ йыл Башҡорт дәүләт филармонияһының музыкаль-әҙәбиәт художество етәксеһе булып эшләй. 1983 йылда Башҡортостан, Рәсәй һәм СССР композиторҙар союзына инә, БР композиторҙар союзының идара ағзаһы, балалар музыкаһы секцияһы рәйесе була. Уның ижадының төп жанры – симфония. Үҙ ғүмерендә яҙған ун симфония милли симфонизм тарихында яңылыҡ булып тора. Һуңғы көндәргә тиклем Нариман Сабитов исемендәге 1-се балалар музыка мәктәбендә белем биргән композиторҙың әҫәрҙәре бөгөн дә бөтә донъя буйлап яңғырай. Башҡортостандың музыка сәнғәтендә тәрән эҙ ҡалдырған, башҡорттоң аҫыл улы, Салауат Юлаев исемендәге Дәүләт премияһы лауреаты һәм Халыҡтар дуҫлығы ордены кавалеры Рафаил Ғәбделхәй улы Ҡасимов менән бөгөн баш ҡалабыҙҙың Башҡорт дәүләт филармонияһында хушлаштылар. Иғтибарығыҙға уның әҫәрҙәрен тәҡдим итәбеҙ. “Увертюра”ны уйнай З.Исмәғилев исемендәге Өфө дәүләт сәнғәт институтының Башҡорт бүлеге милли уйын ҡоралдары оркестры. Дирижеры – Илдар Бигаев. Фото: "Башинформ"дан.