Ҙур Ирәмәл тауының бейеклеге 1582 километр тәшкил итә һәм ул Көньяҡ Уралдың менерлек булған иң юғары түбәһе. Йыл һайын унда бер нисә тиҫтә мең турист бара. Бигерәк тә Силәбе өлкәһенең Төлөк ауылынан һәм Башҡортостандың Николаевка ауылынан йәйәүле маршруттар киң таралған. Шуны билдәләү мөһим, хәҙер 40 километрға һуҙылған Николаевка – Ҙур Ирәмәл –Төлөк маршрутын Яндекс карталары панорамаһында ҡарарға була. 40 километрға һуҙылған һуҡмаҡтың 1273 панорама һүрәттәре буйлап виртуаль рәүештә Николаевка һәм Төлөк ауылдарында йөрөргә мөмкин. Ирәмәл түбәһенән тирә-яҡҡа ҡарап һоҡланырға, шулай уҡ туҡталыштарҙы, шишмәләрҙе, йәшәү урындарын, маршрут буйынса визит-үҙәктәрҙе ҡарарға була. - Яндекс картала бындай масштабта милли һуҡмаҡтың Рәсәйҙәге был тәүге панорамаһы. Мин тап ошо маршрутты ныҡ танылған булғаны өсөн һайланым. Был проектта миңә ярҙам иткәне өсөн Яндекс картаға рәхмәтлемен. Камера беркетелгән таяҡ менән йөрөүе ғәҙәти булманы. Тауҙар буйлап барғанда һәр 20-30 метр һайын туҡталып фотолар эшләнем. Төшөрөү генә ике көн ваҡытты алды. Тәүге көндө Николавка ауылынан башланым, аҙаҡ Ирәмәл тауына мендем һәм Төлөккә төштөм. Барлығы 40 километр юл үттем. Ләкин кисен ҡараңғы төшөү сәбәпле, миңә икенсе көнгә ҡабат Ирәмәлгә менеп яҡтыла панорамаларҙы төшөрөргә тура килде, - тип һөйләне Көньяҡ Урал һуҡмағына нигеҙ һалыусы һәм сәйәхәтсе Рәис Ғәбитов. Панораманы мобиль ҡушымтала һәм Яндекс картаның десктоп версияһында ҡарарға мөмкин. -Ирәмәл тауы – республикала туристарҙы тартып торған иң танылған нөктәләрҙең береһе. Йыл башынан “Ирәмәл” тәбиғәт паркында 29493 кеше булған. Былтыр был һан 32056-ға еткән. Тәбиғәт паркының танылған маршруты панорамаһы туристарға походты планлаштырырға ярҙам итер. Хәҙер тауҙарға юлланыр алдынан, алдан маршрутты ҡарарға мөмкин буласаҡ, - тине Башҡортостандың айырыуса һаҡланған тәбиғәт биләмәлере буйынса дирекцияһы директоры Таһир Бәҙретдинов. Фото: Башинформ.