Радий Хәбиров «Урал» мобиль махсус тәғәйенләнештәге отряд хеҙмәткәрҙәрен һөнәри байрамдары менән ҡотланы

- Подразделениеның шәхси составы хоҡуҡ тәртибен һәм йәмәғәт именлеген һаҡлауҙы тәьмин итә, терроризм һәм экстремизм менән көрәш алып бара, контртеррористик операцияларҙа ҡатнаша. “Урал” отряды иң ауыр һәм яуаплы йүнәлештәрҙә ҡатмарлы мәсьәләләрҙе хәл итә. Отрядтың шәхси составы 1995 йылдан 2019 йылға тиклем Төньяҡ Кавказ төбәгендә ҡораллы конфликт зонаһында хеҙмәт итә. Махсус хәрби операцияның тәүге көндәренән үк яугирҙәр шулай уҡ хеҙмәт командировкалары ваҡытында үҙ бурыстарын лайыҡлы үтәй. Һеҙ - республикабыҙҙың ғорурлығы, батырлығығыҙға һәм сыҙамлығығыҙға һоҡланабыҙ, - тип һыҙыҡ өҫтөнә алды Радий Хәбиров. Башҡортостан Башлығы махсус подразделение етәксеһе, полиция полковнигы Фидрат Ноғомановтың, уның урынбаҫарҙарының һәм бүлек командирҙарының һөнәрилеген юғары баһаланы, шулай уҡ отряд ветерандарына – полиция полковнигы Нәзим Ғаязовҡа, өлкән полиция прапорщигы Раил Әхмәҙиевкә, отставкалағы милиция полковнигы Фәрит Шәйхилисламовҡа, отставкалағы полиция полковнигы Ирек Сәғитовҡа, отставкалағы эске хеҙмәт полковнигы Рәмил Нәбиевкә рәхмәт һүҙҙәрен белдерҙе. - Еңел булмаған хеҙмәтегеҙ өсөн рәхмәт һүҙҙәрен ҡабул итегеҙ. Киләсәктә лә мобиль махсус тәғәйенләнештәге отряд (ОМОН) хеҙмәткәре исемен хөрмәт менән йөрөтөрһөгөҙ тип ышанам, – тип билдәләне Радий Хәбиров. - Һеҙгә ныҡлы һаулыҡ, именлек, Ватанға хеҙмәт итеүҙә уңыштар теләйем. Рәсәй гвардияһының Башҡортостан буйынса идаралығы начальнигы, полиция генерал-майоры Александр Бурдо Радий Хәбировҡа Рәсәй Федерацияһы Милли гвардияһы ғәскәрҙәренең Волга буйы округы командующийы, генерал-лейтенант Сергей Просяник исеменән бурыстарҙы уңышлы хәл итеүҙә булышлыҡ иткәне, Салауат Юлаев исемендәге батальондар ойошторолған осорҙа Рәсәй гвардияһының оператив тәғәйенләнештәге полкын һәр яҡлап тәьмин итеү буйынса емешле эше өсөн Рәхмәт хаты тапшырҙы.