Хеҙмәткәрҙәрҙең уртаса эш хаҡы 98 мең һумдан ашып китә

17 октябрҙә Республика Йортонда Башҡортостан Башлығы Радий Хәбиров һәм Ростех Дәүләт корпорацияһының авиация комплексы индустриаль директоры Анатолий Сердюков төбәктең Өфө моторҙар эшләү производство берекмәһе (Ростех Дәүләт корпорацияһына инә) менән хеҙмәттәшлек мәсьәләләре буйынса эш кәңәшмәһен үткәрҙе. Көн тәртибендә – предприятиены кадрҙар менән тәьмин итеү һәм 2025 йылда билдәләнәсәк Өфө моторҙар эшләү производство берекмәһенең 100 йыллығына әҙерлек. – Ростехҡа республика менән әүҙем хеҙмәттәшлек иткәне өсөн рәхмәт белдерәм. Һеҙҙең контурға ингән предприятиелар тотороҡло эшләй һәм яҡшы күрһәткестәр күрһәтә, – тине Радий Хәбиров. Республика Башлығы шулай уҡ предприятиеның 100 йыллығы уңайынан үткәрелгән сараларҙың мөһимлеген һыҙыҡ өҫтөнә алды. Юбилей саралары федераль статус аласаҡ, шуға күрә уларҙы сифатлы әҙерләү талап ителә. Ростех Дәүләт корпорацияһының авиация комплексының индустриаль директоры Анатолий Сердюков республиканың белем биреү учреждениеларының ОДК предприятиеларын кадрҙар менән тәьмин итеүҙә мөһим ролен билдәләне. - Өфө моторҙар эшләү производство берекмәһе газ турбиналы двигателдәр етештереү күләмен арттыра. Был Башҡортостандың юғары уҡыу йорттары һәм колледждары әҙерләгән квалификациялы белгестәргә ихтыяж тыуҙыра, – тине Анатолий Сердюков. – Кадрҙар әҙерләүҙе Ростехтың производство-уҡыу үҙәге лә башҡара. Өфө моторҙар эшләү производство берекмәһенең идара итеүсе директоры Евгений Семивеличенко хәбәр итеүенсә, предприятие майҙансыҡтарында бөтәһе 25 меңдән ашыу кеше эшләй. 2023 йылдың сентябрендә хеҙмәткәрҙәрҙең уртаса эш хаҡы 98 мең һумдан ашып китә. Өфө моторҙар эшләү производство берекмәһенең юл картаһы хеҙмәт коллективы һанын артабан арттырыуҙы күҙ уңында тота. Өҫтәмә белгестәрҙе йәлеп итеүгә предприятие биргән социаль гарантияларҙың киң йыйылмаһы булышлыҡ итә. Евгений Семивеличенко шулай уҡ төбәктең урта һөнәри белем биреү учреждениелары менән үҙ-ара эш итеү буйынса тәҡдимдәр индерҙе. Башҡортостан Башлығы республика хөкүмәтенә колледждарға машиналар эшләү өлкәһендә профилле һөнәрҙәр буйынса ҡабул итеүҙең контроль һандарын арттырыу, шулай уҡ мәшғүллек хеҙмәте линияһы буйынса белгестәр йәлеп итеү мөмкинлектәрен тикшерергә ҡушты. Сығанаҡ: https://glavarb.ru/rus/press_serv/novosti/171332.html