Өфөлә ҡатын-ҡыҙҙар араһында бокс буйынса Рәсәй чемпионаты үтә

Өфөлә 3-өнән 12 ноябргә тиклем ҡатын-ҡыҙҙар араһында бокс буйынса Рәсәй чемпионаты үтә. Башҡортостан Хөкүмәтендә 2023 йылдың 3 ноябренән 12-енә тиклем үтәсәк ҡатын-ҡыҙҙар араһында бокс буйынса Рәсәй чемпионатын ойоштороу мәсьәләләре тикшерелде. Премьер-министр Андрей Назаров етәкселегендәге кәңәшмәлә Рәсәй Бокс федерацияһы хакимиәте етәксеһе Наталья Фалько (Мәскәү), Хөкүмәт вице-премьерҙары, Башҡортостандың Бокс федерацияһы рәйесе Сәғит Аслаев, спорт структуралары вәкилдәре ҡатнашты. Андрей Назаров билдәләүенсә, бокс республика өсөн төп спорт төрө булып тора. Системалы рәүештә уның менән 9 мең кеше шөғөлләнә, һөнәри рәүештә - 4 мең спортсы. 13 спортсы Рәсәй йыйылма команда составына индерелгән. - Республикала был спорт төрөнә ҡыҙыҡһыныу арта бара. 2017 - 2022 йылдарҙа беҙҙең тренерҙар Рәсәй спорт мастерлығына 400 кандидат, 23 Рәсәй спорт мастеры, шулай уҡ 2 халыҡ-ара класлы Рәсәй спорт мастеры әҙерләне. Бокс буйынса йыл һайын ҙур ярыштар үткәрелә. Бер йыл элек бокс буйынса Рәсәй чемпионкаһы Башҡортостандан Азалия Әминева (Башҡортостан тарихында тәүге ҡатын-ҡыҙ) булды. Беҙ шундай кимәлдәге ярышты Өфөлә үткәрә алыуыбыҙға әҙер икәнлегебеҙҙе аңланыҡ һәм инициатива менән сығыш яһаныҡ, уны хупланылар, - тине Премьер-министр. Наталья Фалько Өфөлә федераль әһәмиәттәге ярыш ойоштороуҙары һәм төбәк халҡын киң спортҡа йәлеп иткәндәре өсөн Башҡортостан Премьер-министрына һәм Хөкүмәткә рәхмәт белдерҙе. Уға әҙерлек план буйынса бара, республика Федерация менән берлектә спортсмендарға ярыш өсөн дә, йәшәү өсөн дә уңайлы шарттар тыуҙырған, тип өҫтәне ул. Башҡортостандың спорт министры Руслан Хәбибов хәбәр итеүенсә, республика Чемпионатты үткәрергә әҙер. Ярыштар Башҡортостан Республикаһының Р. Баталова исемендәге спорт әҙерлеге үҙәгендә үтәсәк. Асыу тантанаһы - 4 ноябрҙә. Финал турнирҙары һәм бүләкләү 11 ноябргә планлаштырылған. Рәсәйҙең 49 төбәгенән 12 ауырлыҡ үлсәмендә 200 спортсы ҡатын-ҡыҙ ҡатнаша. Ойоштороусылар – Башҡортостан Республикаһы Хөкүмәте, Н. Валуев исемендәге олимпия резервы мәктәбе. Андрей Назаров Спорт министрлығына һәм республика Спорт федерацияһына һәм Н. Валуев исемендәге спорт мәктәбенә федераль кимәлдәге ярыштарға әҙерлекте тиҙләтергә ҡушты һәм республиканың спорт тормошо өсөн тарихи был ваҡиға юғары кимәлдә үтергә тейеш, тип билдәләне.